Աֆղանստանում աճել է ավերիչ երկրաշարժի զոհերի ու վիրավորների թիվը

Աֆղանստանում սեպտեմբերի 1-ի գիշերը տեղի ունեցած ավերիչ երկրաշարժի զոհերի թիվը հասել է 812-ի, վիրավորների թիվը գերազանցել է 3000-ը, հայտնել է երկրի Ներքին գործերի նախարարությունը։

Երկրաշարժը գրանցվել է տեղական ժամանակով ժամը 00:17-ին։ Ցնցումների մագնիտուդը կազմել է 6.0։ Դրանց էպիկենտրոնը գտնվել է 10 կմ խորության վրա։ Հիմնական վնասները գրանցվել են Աֆղանստանի արևելյան Կունար և Նանգարհար նահանգներում, որոնք սահմանակից են Պակիստանին։

Կառավարության խոսնակ Զաբիհուլլահ Մուջահիդի խոսքով՝ մահացածների մեծ մասը բնակվել է այս երկու նահանգներում։

«Այստեղ շատ մարդիկ կորցրել են իրենց կյանքն ու տները։ Մեզ անհրաժեշտ է միջազգային օգնություն»,- Reuters-ին ասել է Աֆղանստանի առողջապահության նախարարության խոսնակ Շարաֆաթ Զամանը։