Ռյազանի վառոդի արտադրամասն ամբողջությամբ ոչնչացվել է. զոհերի թիվը շարունակում է աճել

Ռյազանի մարզի գործարանում տեղի ունեցած պայթյունի հետևանքով զոհերի թիվը հասել է 14-ի, հաղորդում է Ռուսաստանի արտակարգ իրավիճակների նախարարության մամուլի ծառայությունը։
Գերատեսչության թարմացված տվյալների համաձայն վիրավորվել է 149 մարդ։ Արտակարգ իրավիճակների նախարարության մասնագետները շարունակում են մաքրել փլատակները։ Զոհերի ինքնությունը պարզվում է։

Նշենք, որ օգոստոսի 15-ի առավոտյան Ռյազանի «Էլաստիկ» ձեռնարկության վառոդի արտադրամասը պայթյունի և հրդեհի հետևանքով ամբողջությամբ ոչնչացվել է։ Միջադեպի նախնական պատճառը «անվտանգության կանոնների խախտումն» է եղել։ Հարուցվել է քրեական գործ։

Ռյազանի մարզի օպերատիվ շտաբը հայտնել է, որ Ռյազանի հիվանդանոցում գտնվում է 15 մարդ, որոնցից 3-ը ծանր վիճակում են, մնացածը՝ միջին ծանրության վնասվածքներով։