«ՀՀ-ն առանց ինքնուրույն հետախուզական համակարգի չի կարող ունենալ իրական անվտանգություն»․ Արման Բաբաջանյան

ԱԺ նախկին պատգամավոր Արման Բաբաջանյանի ֆեյսբուքյան գրառումը․ «Այս գիշեր Իրանի տարածքում Իսրայելի իրականացրած գործողությունները հանդիսանում են ժամանակակից ռազմական հետախուզության, տեխնոլոգիական գերազանցության և ներթափանցման խորության ամենաթափանցիկ դրսևորումներից մեկը։ Նման գործողությունները չեն կարող տեղի ունենալ առանց տարիներով կուտակված տվյալների, ներդրված տեխնոլոգիաների և ռազմավարական ճշգրտության։ Թեհրանում իրականացված հարվածը, որն ըստ աղբյուրների ուղղակիորեն թիրախավորել է բնակելի շենքի ներսում գտնվող բարձրաստիճան պաշտոնյային, արտացոլում է ոչ միայն տեխնիկական առաջադիմությունը, այլ տեղեկատվական գերիշխանությունը։ Իսրայելի հրթիռը ճշգրիտ անցել է շենքի պատով՝ պայթելով ներսում՝ նպատակային բնակարանում։ Այս գործողությունը հնարավոր է դարձել բացառապես այն դեպքում, երբ հարձակվող կողմն ունի համակողմանի, խորքային ու անընդհատ թարմացվող հետախուզական ներգործություն՝ այնպիսի հարթության վրա, որը գերազանցում է սովորական ռազմական մեթոդները։
Դա հուշում է, որ ապագա պատերազմները այլևս չեն լինի դասական առճակատումների, զանգվածային զորքերի և սահմանային բախումների տեսքով։ Դրանք լինելու են թիրախային, ոչ գծային պատերազմներ՝ հիմնված տվյալների մշակումով, արբանյակային վերահսկմամբ, հետախուզության բարձր ճշգրտությամբ և կիբեռգերազանցությամբ։ Հաղթելու են այն պետությունները, որոնք ունեն իրենց սեփական արբանյակները, հեռադիտարկման համակարգերը, մոբիլ հետախուզական ստորաբաժանումները, կիբեռվերլուծության կարողությունները և պետական ինտեգրացված կառավարման կառուցվածքը, որը կարող է միաժամանակ արձագանքել, կանխատեսել և հարվածել։
Սեփական հետախուզության բացակայությունը Հայաստանի համար ցավոտ ու ավերիչ դաս դարձավ 44-օրյա պատերազմի ընթացքում։ Մենք չգիտեինք որտեղ է հակառակորդը, ինչ է պատրաստվում անել, երբ է հարվածելու։ Իսկ առանց այդ գիտելիքի՝ անվտանգության որևէ համակարգ դառնում է կույր և անօգնական։ Ռուսական հետախուզության նկատմամբ տարիներ շարունակ ցուցաբերած կեղծ վստահությունը, որի հիմքում ընկած էր ոչ թե պրոֆեսիոնալ գնահատականը, այլ քաղաքական կախվածությունը, մեզ զրկեց մեր ռազմավարական վտանգները ինքնուրույն դիտարկելու և գնահատելու հնարավորությունից։ Մենք վստահեցինք մի համակարգի, որը գործում էր ոչ թե մեր օգտին, այլ մեզ օգտագործելով։
Իսրայելի հետախուզական գործողությունը Իրանի տարածքում ոչ միայն գերհաջող ռազմական գործողություն է, այլ նաև ազդանշան․ անվտանգությունը այլևս կապ չունի զուտ բանակի քանակի կամ զենքի տեսակի հետ։ Անվտանգությունը սկսվում է տեղեկատվական գերիշխանությունից։ Ով հավաքում է տեղեկատվություն, նա է որոշում՝ ո՞ւմ է հասնելու հարվածը, ե՞րբ, ի՞նչ ձևով և ինչ գնով։
Հայաստանը պետք է ստեղծի ինքնուրույն, բարձր տեխնոլոգիական, ամբողջական և ռազմավարական հետախուզական համակարգ: Առանց դրա Հայաստանը չի կարող ունենալ իրական անվտանգություն, կանխատեսելիություն և ինքնիշխանություն։ Ժամանակակից աշխարհում պետությունները գոյություն ունեն ոչ միայն սահմաններով, այլ տեղեկության վերահսկմամբ։ Առանց այդ վերահսկողության՝ երկիրը մնում է անպաշտպան ոչ միայն ռազմական, այլև դիվանագիտական, տնտեսական և ներքին կայունության տեսանկյունից։ Պետություն, որը չի տեսնում վտանգը՝ չի կարող կանխել այն։ Իսկ չկանխված վտանգը վաղ թե ուշ իրականություն է դառնում»։