«Նիդեռլանդներում դեռ հիշում են ՀՀ վարչապետի և թարս դրոշի պատմությունը»․ Վահագն Սարոյան

Ռազմական փորձագետ Վահագն Սարոյանի ֆեյսբուքյան գրառումը․ «Երեկ զանգ ստացա Նիդերլանդներից և տեղեկացա, որ թեպետ Տիրանայում տեղի ունեցած գագաթաժողովից անցել է ավելի քան երեք շաբաթ, բայց Նիդերլանդներում դեռ հիշում են ՀՀ վարչապետի պաշտոնը զբաղեցնողի ու թարս դրոշի պատմությունը։ Նյութեր են հրապարակվում, քննարկումներ են տեղի ունենում նիդերլանդներում բնակվող ազգությամբ հայերի հետ՝ արտահայտելով խոր զարմանք վարչապետի ու դրոշի նկատմամբ վերաբերմունքի մասին։
Հիշեցնեմ, որ Տիրանայում Նիդերլանդների վարչապետի հետ հանդիպման ժամանակ ՀՀ վարչապետի դերակատարի դիմաց դրված դրոշը եղել է գլխիվայր շուռ տված։ Պաշտոնական կայքերը տարածեցին հանդիպման տեսանյութը, ապա արագ հեռացրին, քանի որ տեսան դրոշը շուռ տված է տեղադրված իրենց շեֆի առաջ։ Այդ մասին բնականաբար շատ է խոսվել, բայց Հոլանդիա տեղ խոսակցությունը շարունակվում է, որովհետև իրենց մոտ նոնսենս է պետական դրոշի նկատմամբ այդպիսի վերաբերմունքը։
Հիշո՞ւմ եք, երբ Նիկոլը նոր էր հայտնվել վարչապետի պաշտոնում այցելեց մաքսային և այնտեղ պատահաբար աչքով ընկավ ՀՀ դրոշը հենած պատին, միանգամից մեծ աղմուկ բարձրացրեց իր ոճի մեջ, անգամ մի աշխատակից էլ ազատվեց աշխատանքից, միայն նրա համար, որ ինքն էր պատասխանում պոպուլիստ վարչապետի ագրեսիվ հարցերին։ Դրոշացավ էր կպել այդ ժամանակ նիկոլապաշտ զանգվածը, թե բա մեր դրոշը ո՞նց կլինի հենած լինեն պատին։ Հիմա այդ նույն վարչապետի դիմաց դրոշ են դնում գլխիվայր շուռ եկած, ու ինչո՞ւ վարչապետն ինքն իրեն չի ազատում աշխատանքից»։