Կաթողիկոսը չնստեց մեքենա ու քայլեց հավատացյալների ուղեկցությամբ

«Զվարթնոց» օդանավակայանի բակում իր ուղերձից հետո Ամենայն հայոց Կաթողիկոս Գարեգին Բ-ն հրաժարվեց մեքենա նստելուց ու մի որոշ տարածություն քայլեց հավատավոր ժողովրդի հետ միասին: Նա խոստացավ, որ իր հետ դեռ հանդիպումներ կլիներ գալիք շաբաթ կայանալիք Արարատյան տոներին, որն ամբողջանում է Սուրբ Էջմիածնի տոնով: «Այդ առիթով նախատեսել ենք, որ Մայր տաճարի շուրջ կզետեղենք սուրբ մասունքներ, մեր հավատավոր զավակները պիտի կարողանան գալ ու այդ մասունքներից օրհնություն ստանալ: Այնպես որ, հիմա բաժանվենք, ինչպես ընդունված է ասել՝ հանգիստ քուն և բարի երազներ»,- հավաքվածներին հրաժեշտ տվեց կաթողիկոսը: