«Երաշխավորված չէ, որ Նիկոլի դեմ պայքարն անցնելու է անվնաս, նա ամեն ինչի ընդունակ է». Աննա Գրիգորյան

«Իմպիչմենթի գործընթացին միանալը հերոսություն չէ, դա նվազագույնն է, որ ընդդիմադիր պատգամավորը կարող է անել»,- լրագրողների հետ զրույցում ասաց ԱԺ «Պատիվ ունեմ» խմբակցության պատգամավոր Աննա Գրիգորյանը:

Այն հարցին, թե «ՔՊ-ի հետ քննարկումներ ունեցե՞լ եք, բա որ նրանք անվստահություն չհայտնե՞ն Փաշինյանին», պատգամավորը արձագանքեց. «Ես երաշխավորված պայքար չեմ ունեցել Նիկոլի դեմ, ցանկացած պահի, երբ ես սկսեմ «բա որ»-ով առաջնորդվել, նշանակում է կա՛մ պետք է Նիկոլի հետ պայմանավորված լինեմ, կա՛մ տերեր պետք է ման եկած և գտած լինեմ, որոնք ինձ կերաշխավորեն ինչ-որ պայքարի ելք»:

Գրիգորյանի խոսքով՝ Նիկոլն այն ազգադավն է, որը ամեն ինչի ընդունակ է ՀՀ-ն Թուրքիայի լծի տակ դնելու համար, «հետևաբար որևէ մեկը չի կարող երաշխավորել, որ Նիկոլի դեմ այս պայքարը մեզ համար անցնելու է անվնաս, ինքը ամեն ինչի ընդունակ է»: