«Պատկերացնել կարելի է, թե ինչ է տեղի ունենալու 2026-ի հունիսին». Թաթուլ Հակոբյան

Լրագրող Թաթուլ Հակոբյանի ֆեյսբուքյան գրառումը. «Երբեմն լռելը նախընտրելի է, հատկապես, երբ կրթությունն ու դաստիարակությունը մարդուն թույլ չի տալիս օգտագործել այն բառապաշարը, որը օգտագործում են պետության բարձրաստիճան պաշտոնյաները:
Ատելության, անհանդուրժողականության այս մթնոլորտում որևէ բանական միտք չի կարող կյանք ունենալ:
Կամ պիտի սևերի ու սպիտակների հետ լինես, կամ պիտի լռես:
Երբ ընտրություններից մեկ տարի առաջ այս անհանդուժող ու ատելության մթնոլորտն է, պատկերացնել կարելի է, թե ինչ է տեղի ունենալու 2026-ի հունիսին:
Եթե անգամ ընդդիմությունն է օգտագործում կամ առաջինն է օգտագործել անպարկեշտ, վիրավորական բառապաշար, ապա իշխանությունները չպետք է տրվեին դրան:
Պետք էր բարձր մնալ:
Ցավոք, այս դեպքում հենց իշխանություններն են հրահրում անտանելի այն մթնոլորտը, որտեղ ապրում ենք:
Մի անգամ գրել եմ և ուզում եմ կրկնել. հատկապես պարտությունից, աղետից ու արհավիրքից հետո պետք էր ավելի զուսպ լինել:
Երբ հակառակորդ պետության ղեկավարին/ներին չես կարողանում պատշաճ պատասխան տալ, երկրի ներսում քաղաքական և հոգևորական ընդդիմադիրների հանդեպ այս բառապաշարը առավել, քան անընդունելի է:
Բայց ուշ չէ:
Պետք է կանգ առնել:
Մեր լեզուների տակ ոսկոր կա:
Բարձր մնացեք»: