«Կուսակցականներն ու պետական պաշտոնյաները չեն ներգրավվի խոշորացված բուհերի կառավարման մարմիններում»․ Ժաննա Անդրեասյան

«Ունենք շատ լուրջ և համակարգային խնդիրներ բարձրագույն կրթության և գիտության ոլորտներում»,-այսօր Կառավարության նիստին ասաց ԿԳՄՍ նախարար Ժաննա Անդրեասյանը՝ շարունակելով․ «Բարձրագույն կրթությունը տարիների ընթացքում հեռացել է հետազոտահենք կրթության օրակարգից՝ ձևափոխվելով միայն դասախոսությունների վրա հիմնված գործընթացի, հաճախ՝ որակի և մրցունակության էական թերացումներով։ 2005 թվականից մինչև հիմա փաստացի անցում չի կատարվել բարձրագույն կրթության երկրորդ մակարդակին, և չեն դրվել միջազգային արդի պայմաններին համապատասխանող մասնագետների պատրաստման օրենսդրական հիմքեր, ինչի հետևանքով չի գործում բարձրագույն կրթության եռաստիճան համակարգը, և փոխարենը գիտական աստիճանի շնորհումը չի դիտարկվում իբրև կրթության մաս, այլ պահպանվում է գիտական աստիճանաշնորհման՝ սովետական համակարգից ժառանգած երկաստիճանությունը»,- ասաց նախարարը։

Նա հայտնեց, որ մշակվել են «Բարձրագույն կրթության և գիտության մասին» օրենքի և հարակից օրենքներում փոփոխություններ և լրացումներ կատարելու մասին» օրենքների նախագծեր, որոնց շրջանակում առաջարկվում է կրթության մատուցումն ապահովել լիցենզավորման և հավատարմագրման միջոցով: Կներդրվի նաև ոլորտի կառավարման թվային միջավայր, ուսանողների կրթաթոշակների բազմամակարդակ մոտեցում: Կկարգավորվի նաև համալսարանների ինկուբատորների ստեղծման ոլորտը:

Կվերանայվեն գիտության կազմակերպման սկզբունքները, և գիտական կազմակերպությունները կգործեն խոշորացված հետազոտական համալսարանների համակարգի կառուցվածքում:

«Բուհական համակարգը քաղաքական գործընթացներից զերծ պահելու համար կուսակցական անձինք կամ պետական բարձր պաշտոններ զբաղեցնողները չեն ներգրավվի խոշորացված բուհերի կառավարման մարմիններում և ղեկավար պաշտոններում»,- ասաց Անդրեասյանը։
Նախագծի մանրամասները՝ տեսանյութում։