«Մի՞թե կարելի է այսպես վարկաբեկել ուսուցչի հեղինակությունը»․ Լիլիթ Գալստյան

ԱԺ «Հայաստան» խմբակցության պատգամավոր Լիլիթ Գալստյանի ֆեյսբուքյան գրառումը․ «Սա անթույլատրելի, աղետալի երևույթ է, ցինիզմ։ Կրթական հաստատությունում այսպիսի հրապարակային լինչի դատաստան տեսնել ուսուցչի նկատմամբ՝ ներգրավելով աշակերտների։
Սա պարզապես հատակն է, որևէ առնչություն չունի դաստիարակության, կրթական պրոցեսի կամ աշակերտների իրավունքների հետ։ Մի՞թե կարելի է այսպես վարկաբեկել ուսուցչի հեղինակությունը, դպրոցն առհասարակ։
Ուսուցչուհու վարքն ու մանկավարժական կարողությունները միայն մանկավարժական խորհրդի և տնօրինության քննարկման առարկան պիտի լիներ։
Ինչպե՞ս կարելի էր հասնել այս հանգրվանին, սա մեկ օրվա պատկեր չէ․․․
ԱԺ ամբիոնից մինչև համայնքային դպրոց բռնության ու լպիրշության մշակույթ։ Առաջին հայացքից կարող է թվալ, թե կապ չունեն միմյանց հետ։ Բայց դեգրադացիան այս պատկերն ունի․․․ և այն վարակիչ է։
Համատարած երկիր- մղձավանջ»։
Հիշեցնենք՝ մայիսի 13-ին Մերձավան համայնքի միջնակարգ դպրոցում դասադուլ էր հայտարարվել: Ուսուցիչները, ծնողներն ու աշակերտները դժգոհում էին նույն դպրոցի պատմության ուսուցչուհի Ռոզա Դավթյանից։ Նրանց պնդմամբ՝ Դավթյանն արդեն 6 ամիս դասավանդում է դպրոցում և ուսուցչին ոչ հարիր վարք է դրսևորում, վիրավորում է աշակերտներին, ուսուցչական կազմին, ոչ պատշաճ կերպով է արտահայտվում արցախցիների մասին: Իսկ Ռոզա Դավթյանը նշում էր, որ դպրոցի ամբողջ անձնակազմը, ծնողների ու աշակերտների հետ միասին, դուրս են եկել իր դեմ և կազմակերպված կերպով ցանկանում են ազատվել իրենից: