ԱԺ նախկին պատգամավոր Արման Բաբաջանյանի ֆեյսբուքյան գրառումը․ «Հայաստանում ամերիկյան մոդուլային ատոմային կայանի կառուցման գործընթացը շրջադարձային իրադարձություն է, որն ամբողջովին վերափոխում է ոչ միայն մեր երկրի էներգետիկ համակարգը, այլև տարածաշրջանային անվտանգության ճարտարապետությունը։ Westinghouse ընկերության հետ համագործակցությունը և ԱՄՆ կառավարության ակտիվ աջակցությունը ցույց են տալիս, որ այս նախաձեռնությունը շատ ավելին է, քան պարզապես էներգետիկ ենթակառուցվածքի նախագծում։ Այն դառնում է Հայաստանի և Միացյալ Նահանգների ռազմավարական գործընկերության խորացման առանցքային հենասյուներից մեկը։ Westinghouse Electric Company-ն համաշխարհային առաջատար է միջուկային էներգետիկայի ոլորտում՝ նորարարական տեխնոլոգիաների և անվտանգության չափանիշների կիրառման շնորհիվ։ ԱՄՆ-ի դաշնակից բազմաթիվ երկրներ՝ Հարավային Կորեան, Ճապոնիան, Չեխիան, Լեհաստանը, Մեծ Բրիտանիան, հաջողությամբ ինտեգրել են Westinghouse-ի տեխնոլոգիաները՝ ապահովելով ոչ միայն էներգետիկ ինքնաբավություն, այլև ամրապնդելով իրենց ռազմավարական անվտանգությունը։ Այս մոդելը վկայում է, որ երբ ԱՄՆ-ը մասնակցում է երկրի էներգետիկ միջուկային նախագծերին, այդտեղ ոչ միայն տնտեսական, այլև երկարաժամկետ պաշտպանական համագործակցության բաղադրիչ կա։ Հայաստանում մոդուլային ատոմակայանի կառուցումը պետք է դիտարկել որպես տարածաշրջանի համար նոր էներգետիկ և անվտանգային հավասարակշռության ձևավորում։ Այս ծրագիրը երեք հիմնական ուղղությամբ է փոխելու Հայաստանի ռազմավարական դիրքը. Առաջին, Հայաստանը դառնում է էներգետիկ հաբ, որը հնարավորություն կունենա էլեկտրաէներգիայի մատակարար դառնալու ոչ միայն իր ներքին շուկայի, այլև բոլոր հարևան երկրների համար՝ ներառյալ Ադրբեջանը, Թուրքիան, Իրանը և Վրաստանը։ Էլեկտրաէներգետիկ կախվածությունը Հայաստանից կդառնա արդյունավետ զսպող մեխանիզմ տարածաշրջանային կայունության համար, ինչպես նաև տնտեսական երկարաժամկետ ապահովագրություն՝ հնարավոր ճնշումների դեմ։ Երկրորդ, ամերիկյան տեխնոլոգիաների կիրառմամբ և ներդրումով ատոմակայանի կառուցումը ենթադրում է, որ այդ օբյեկտի անվտանգությունը դառնում է միջազգային—առաջին հերթին՝ ամերիկյան—անվտանգության համակարգի բաղկացուցիչ մասը։ Փաստացի, սա ավելացնում է ԱՄՆ ռազմավարական ներկայությունը Հայաստանում առանց ֆորմալ ռազմական բազայի ձևաչափի, ինչը բխում է տարածաշրջանում հավասարակշռված և զուսպ, բայց արդյունավետ պաշտպանության քաղաքականությունից։ Երրորդ, այս նախագիծը սերտորեն կապված է 2024 թվականի ապրիլի 5-ի ՀՀ-ԱՄՆ-ԵՄ բարձր մակարդակի հանդիպման ընթացքում ձեռք բերված պայմանավորվածություններին։ Եվրոպական Միությունը, որը հավակնում է դիվերսիֆիկացնել իր էներգետիկ աղբյուրները, ռազմավարական շահագրգռություն ունի Հարավային Կովկասում կայուն և վստահելի գործընկեր ունենալու հարցում։ Հայաստանի միջոցով ԵՄ-ն ստանում է նոր հնարավորություն՝ ապահովելու էներգետիկ ուղղություն, որը քաղաքականորեն անվտանգ է և տեխնոլոգիապես զարգացած։ Այս նախաձեռնությունը վեր է դասվում սովորական տնտեսական ծրագրերից։ Այն Հայաստանի համար դառնում է ազգային անվտանգության, էներգետիկ անկախության և միջազգային դերակատարության ամրապնդման խոշոր գործիք։ Մինչ այժմ տարածաշրջանում էներգետիկ առաջատարությունը կենտրոնացած էր նավթով և գազով հարուստ պետությունների ձեռքում։ Հայաստանը, չունենալով այդ ռեսուրսները, ստանում է հնարավորություն խաղի կանոնները փոխելու և անցնելու նոր դարաշրջան՝ հիմնված բարձր տեխնոլոգիաների, գործընկերության և սուվերեն էներգետիկ կարողությունների վրա։ Այս ծրագիրը նաև հստակ ուղերձ է Մոսկվային և Անկարա-Բաքու տանդեմին, որ Հայաստանը դուրս է գալիս արտաքին կախվածության շրջանակներից և ձևավորում է իր անվտանգության ու զարգացման մոդելը՝ հենվելով արևմտյան կառույցների և ԱՄՆ-ի հետ ռազմավարական գործընկերության վրա։ Ամփոփելով՝ Հայաստանում ամերիկյան մոդուլային ատոմակայանի կառուցումը դառնալու է այն առանցքը, որի շուրջ կկայունանա երկրի տնտեսական աճը, տարածաշրջանային ազդեցությունը և անվտանգային համակարգը։ Սա Հայաստանի պատմական հնարավորություն է՝ վերածվելու էներգետիկ և ռազմավարական կենտրոնի՝ ապահովելով իր արժանապատիվ տեղը միջազգային համակարգում»։
