«Ջերմ զրուցում էիք, Արփի Դավոյանը համոզում էր, որ կարճեի՞ք իր մասով գործը»․ հարց՝ ՔԿ ղեկավար Արթուր Պողոսյանին

Լրագրողների հետ զրույցում Քննչական կոմիտեի ղեկավար Արթուր Պողոսյանն անդրադարձավ դիտարկմանը, որ այսօր նիստի ընդմիջմանը ջերմ զրուցել է ՔՊ-ական պատգամավոր Արփի Դավոյանի հետ։ Լրագրողները հետաքրքրվեցին՝ ի՞նչ էին քննարկում, արդյո՞ք Դավոյանը խնդրել է կարճել ՔԿ-ում քննվող այն գործը, որտեղ ինքն ունի վկայի կարգավիճակ։

ի պատասխան՝ Պողոսյանն ընդգծեց, որ որևէ անձից որևէ կաշկանդվածություն չունի, և չգիտի՝ ինչ գործի մասին է խոսքը։

«Մենք գործով, որևէ կոնկրետ քրեական վարույթով կամ առանձին վարույթների վերաբերյալ որևէ քննարկում չենք ունեցել, չենք ունենալու։ Ինչ քննարկում ունեցել ենք, եղել է՝ հրապարակային»,- ասաց Պողոսյանը՝ հավելելով՝ անձը, եթե վկայի կարգավիճակով է, ի՞նչ կարճման մասին է խոսքը։