«Մի լսեք այն մարդկանց, ովքեր պատրանքային հույսեր են ներշնչում»․ Թաթուլ Հակոբյանը՝ արցախցիներին

Լրագրող Թաթուլ Հակոբյանի ֆեյսբուքյան գրառումը․ «Վերջին ամիսներին ու շաբաթներին, բարեբախտաբար, ավելի քիչ եմ լինում Երևանում, էլ ավելի բարեբախտաբար, առաջիկա ամիսներին ու տարիներին շատ-շատ ավելի քիչ կլինեմ:
Մեր Մասիվներում արցախցիները շատ են, մեր շենքում էլ կա, իմ ներքևի հարևանը մեծ ընտանիք է, թվում է՝ բարեկեցիկ, ինչը շատ լավ է:
Ես չեմ տեսել կենցաղում մի դեպք, երբ հայաստանցիները վիրավորեն արցախցիներին, չեմ տեսել, գուցե կա, եղել է, ես չեմ տեսել: Նույնը կասեմ մեր Տավուշում, որտեղ գործատուները հատուկ արցախցիներին են նաև գործի վերցրել՝ դրանով իրենց փոքր օժանդակությունը բերելով արհավիրքի ու կարիքի մեջ գտնող մարդկանց: Ես գիտեմ նաև շատ հայաստանցիների, որոնք հատուկ առևտուր են անում այն խանութից, որի տերը արցախցի է:
Այս պատմությունները, սակայն, չի հետաքրքրում մարդկանց, ում հոգիներում և ուղեղներում ատելություն կա: Արցախցիների թիրախավորումները հիմնականում ֆեյսբուքում են, ինչը, անկասկած, դատապարտելի է:
Ընդհանրապես, դատապարտելի է ատելությունը, ով էլ լինի թիրախում: Ես նաև նկատել եմ ու կրկին միայն ֆեյսբուքում բարեբախտաբար, որ արցախցիների հանդեպ թշնամանքի ու ատելության դրսևորումների վրա որոշ մարդիկ ձեռքեր են տաքացնում:
Ցավալի է, որ այդպես է:
Ի դեպ, ես իմ ճանաչած արցախցիներին կամ երբ ինձ հարցնում են, անկեղծորեն ասում եմ՝ ընդունեք ՀՀ քաղաքացիություն և օգտվեք տուն ձեռք բերելու և կամ կառուցել այն հնարավորությունից, որ այսօր ընձեռում է պետությունը՝ հարկատուների հաշվին: Ավելի կարևոր է ձեր երեխաների արժանապատիվ ապագան:
Ավելին, ասում եմ, որ մի լսեք այն մարդկանց, ովքեր ձեզ հետ են պահում ՀՀ քաղաքացիություն ստանալու վնասներից և պատրանքային հույսեր են ներշնչում»: