«Հայի արյուն կրող հակահայն այսպես է վաստակում իր հացի կտորը»․ Արամայիս Աղաբեկյան

Արցախի ԱԺ պատգամավոր Արամայիս Աղաբեկյանի ֆեյսբուքյան գրառումը. Մարգարիտա Սիմոնյանը հերթական անգամ սպառնացել է Հայաստանին՝ պնդելով, որ հարաբերությունների վատթարացումը Ռուսաստանի հետ կհանգեցնի Հայաստանի Հանրապետության վերացման։
Տիկին Մարգոն շատ հետաքրքիր տիպ է՝ հայի արյուն կրող, բայց հակահայ մարմնացում։ Նա այսպիսի արտահայտություններով վաստակում է հացի կտոր և ուրախությամբ գնում տուն։
Խնդիրը այստեղ նա չէ, ոչ էլ նրա նմանները՝ ովքեր վխտում են ոչ միայն Հայաստանի սահմաններից դուրս, այլև մեր հայրենիքում։
Խնդիրը մեր՝ հայկական շահեր կրողների առավելագույն արագ մոբիլիզացիան է, մեր մտքի, գիտելիքի և կամքի միավորման, ինչպես նաև քաղաքական ինքնակազմակերպման գործընթացը։
Մարգարիտա Սիմոնյանների լավագույն պատասխանը պետք է լինի հայկական ուժերի արագ քաղաքական ինքնակազմակերպումը։
Ընտրության ինստիտուտի միջոցով՝ մեր շարքերից առաջնորդների ընտրությունն ու հայ ազգի հետ բացառիկ բաց հաղորդակցությունը։
Լուծումներ, մտքերի ու տեսակետների բախում, ամեն ինչ բաց ու թափանցիկ՝ առավելագույն ներգրավվածությամբ։
Ողջ աշխարհի և հայ ազգի առաջ պիտի ծնվի հայկական քաղաքական միավորումը, որը պատասխանատվություն կստանձնի ՀՀ-ի համար և կհաստատի փոխադարձ շահերին համահունչ հարաբերություններ և՛ Ռուսաստանի, և՛ մյուս պետությունների հետ։
Մարգո Սիմոնյաններն էլ թող այդ ժամանակ այլ գործ գտնեն ու իրենց հացը այլ կերպ վաստակեն։
Հայաստանի ներսում գտնվող Մարգոների համար հաց գտնելու հեռանկարը, մեր ինքնակազմակերպման դեպքում, ավելի անորոշ պետք է դառնա։
Հա քիչ մնաց մոռանամ, այս ուղղությամբ դրական մեծ շարժ կա, իրավիճակի բարդությունը ծնում է նոր հնարավորություններ»։