«Ամաչում եմ Թուրքիան կառավարողների փոխարեն»․ Օզելը տեսակցել է Իմամօղլուին

Թուրքիայի ընդդիմադիր Ժողովրդահանրապետական կուսակցության առաջնորդ Օզգյուր Օզելն այսօր այցելել է կալանավորված թիմակցին՝ Ստամբուլի նախկին քաղաքապետ Էքրեմ Իմամօղլուին։

Սիլիվրի բանտում երկու ժամ տևած տեսակցությունից հետո Օզելը լրագրողներին ասել է, որ ամաչում է Թուրքիան կառավարողների փոխարեն և այն իրավիճակի համար, որում հայտնվել է երկիրը։

Ընդդիմադիր առաջնորդը հայտնել է նաև, որ այսօր երեկոյան Ստամբուլի քաղաքապետարանի մոտ հանրահավաք են անցկացնելու։

Ստամբուլում ու Թուրքիայի այլ խոշոր քաղաքներում արդեն վեց օր է՝ բողոքի զանգվածային ցույցեր են։