«Հանդիպումը կառուցողական էր»․ Ումերովը՝ Ուկրաինա-ԱՄՆ բանակցությունների մասին

Էր Ռիադում ավարտվել են ուկրաինական և ամերիկյան պատվիրակությունների բանակցությունները, X սոցիալական ցանցում հայտնել է Ուկրաինայի պաշտպանության նախարար Ռուստեմ Ումերովը, ով գլխավորում էր Ուկրաինայի պատվիրակությունը։

«Մենք ավարտել ենք հանդիպումը Ամերիկայի պատվիրակության հետ։ Զրույցը կառուցողական էր և բովանդակալից: Քննարկել ենք առանցքային, այդ թվում՝ էներգետիկային առնչվող հարցեր»,- ասել է նախարարը։

«Նախագահ Զելենսկու նպատակն է՝ ապահովել արդար և երկարաժամկետ խաղաղություն մեր երկրի, մեր ժողովրդի և, համապատասխանաբար, ողջ Եվրոպայի համար։ Մենք աշխատում ենք այդ նպատակն իրականություն դարձնելու ուղղությամբ»,- ընդգծել է Ումերովը։

Այսօր՝ մարտի 24-ին Սաուդյան Արաբիայում կհանդիպեն նաև ԱՄՆ-ի և Ռուսաստանի ներկայացուցիչները։ Ռուսական պատվիրակությունը գլխավորող Գրիգորի Կարասինը հայտնել է, որ պատվիրակությունն արդեն ժամանել է Էր Ռիադ։