«Անհնար է մեկնարկային արժեքի 30%-ով որակով բարեկարգում իրականացնել»․ Արթուր Չախոյան

Բլոգեր Արթուր Չախոյանի ֆեյսբուքյան գրառումը․ «Նոր բացված «Էյ Ջի Տի Սերվիս» ՍՊԸ-ն մասնակցել է Երևանի քաղաքապետարանի բակերի բարեկարգման տենդերներին, երեք լոտերում առաջարկել է մեկնարկային արժեքից 50%-ով ավելի ցածր գին և հաղթել։ Նշեմ, որ հաղթած ընկերությունը պետք է այդ 50%-ից դեռ վճարի 20% ԱԱՀ/ՆԴՍ։
Բացի այդ, նախահաշվարկային ծավալաթերթի արժեքը կազմելիս հաշվի են առնվում ծախսերը, և հաշվարկներով նախատեսվում է ընկերության համար 8-11% շահույթ։ Դրանից ցածր գին առաջարկելը արդեն իսկ կոռուպցիոն ազդանշան է։
Գործից հասկացող մարդիկ գիտեն, որ անհնար է մեկնարկային արժեքի 30%-ով որակով բարեկարգում իրականացնել։ Արդյունքում բոլորս ականատես ենք լինում անորակ աշխատանքների, որոնք շահագործման հանձնվելուց կարճ ժամանակ անց քանդվում են։
Ամեն դեպքում, այս աշխատանքներին լինելու եմ հետևողական և իմ հնարավորությունների սահմաններում ամեն ինչ կանեմ, որ շինաշխատանքները կատարվեն որակյալ»։