«Համոզված եմ, որ այս գործով ՔԿ-ն և Դատախազությունը քաղաքական իշխանությունից ունեն հանձնարարական»․ Տիգրան Աբրահամյան

«Փաշինյանական արդարադատությունից որևէ ակնկալիք չունենք, մեր խնդիրն է աջակցել Տիգրան Ուլուբաբյանին, ով խոշտանգվել է համակարգի կողմից»,- այս մասին լրագրողների հետ զրույցում նշեց ՀՀ ԱԺ «Պատիվ ունեմ» խմբակցության քարտուղար Տիգրան Աբրահամյանը։

«Երեկ տեղի ունեցած պրոցեսները ցույց տվեցին, որ այն միջամտությունները, որ պետք է ունենան Քննչական կոմիտեն կամ Դատախազությունը, տոտալ ձևով բացակայում են։ Ես համոզված եմ, որ Քննչական կոմիտեն և Դատախազությունը քաղաքական իշխանության կողմից ունեն հանձնարարական, որ այս գործով վարվեն այնպես, ինչպես իրենք են նպատակահարմար համարում»,- նշեց պատգամավորը։

Նշենք, որ Քննչական կոմիտեի դիմաց հավաքվել են քաղաքացիներ՝ իրենց դժգոհությունը հայտնելու արցախցի Տիգրան Ուլուբաբյանի նկատմամբ Ոստիկանության Լոռու մարզային վարչությունում կատարված բռնության և բռնություն կատարած ոստիկանների ձերբակալված չլինելու առնչությամբ։