Շվեյցարիայի խորհրդարանը կողմ է քվեարկել «Լեռնային Ղարաբաղի համար խաղաղության ֆորումի» ստեղծմանը

Շվեյցարիայի Դաշնային ժողովի վերին պալատը՝ Կանտոնների խորհուրդը, ընդունել է «Լեռնային Ղարաբաղի համար խաղաղության ֆորում. հայերի վերադարձի հնարավորության ապահովում» նախագիծը, որը Շվեյցարիայի իշխանություններին կոչ է անում առանձին հարթակ ստեղծել Լեռնային Ղարաբաղի և Ադրբեջանի ներկայացուցիչների միջև երկխոսության համար։

Այս նախաձեռնության նպատակն է ապահովել բռնի տեղահանված հայ բնակչության անվտանգ, հավաքական և արժանապատիվ վերադարձն իրենց պատմական հայրենիք։
«Խորհրդի 46 անդամներից 29-ը կողմ քվեարկեցին նախաձեռնությանը, որով Շվեյցարիայի իշխանություններին կոչ է արվում ստեղծել առանձնացված հարթակ՝ Լեռնային Ղարաբաղի և Ադրբեջանի ներկայացուցիչների միջև երկխոսության համար»,- նշված է Շվեյցարիայի խորհրդարանի տարածած հաղորդագրության մեջ։

Կանտոնների խորհրդի որոշումը հաջորդում է Ազգային խորհրդի՝ խորհրդարանի ստորին պալատի կողմից նույն առաջարկի ընդունմանը, որը կայացել է 2024թ. դեկտեմբերի17-ին։