«Բուսաբանական այգու` զրոյականին մոտ բյուջեն թույլ չի տալիս անգամ չորացած ծառերը հատել». այգու նախկին տնօրեն

Երևանի բուսաբանական այգու նախկին տնօրեն Արսեն Գասպարյանը գրում է. «Երևանի բուսաբանական այգում շուրջ երկու տասնյակի հասնող հաստաբուն կաղնու ծառերի հատումը, որպես նախկին տնօրեն, չէր կարող անտարբեր թողնել ինձ։ Այդ մասին ինձ գրում են սրտացավ մարդիկ, մասնագետները և լրագրողները՝ ցանկանալով որոշ պարզաբանումներ․
1. Նախ, հերթական անգամ նշեմ, որ ես՝ իմ դիմումի համաձայն, 2024թ․ հուլիսի 1-ից այլևս չեմ զբաղեցնում Ինստիտուտի տնօրենի պաշտոնը և չեմ կարող կարծիք հայտնել գործընթացների վերաբերյալ ամբողջությամբ չտիրապետելու պատճառով։ Ըստ Երևանի բուսաբանական այգու պաշտոնական պարզաբանման՝ դեպքը տեղի է ունեցել 2024թ․ աշնանը, (սկզբում նշված 2023-2024 թթ իրականության հետ ոչ մի աղերս չունի)։
2. Իմ կողմից կառույցի ղեկավարման ընթացքում նույնպես հատվել են չորացած ծառեր, որոնք նախապես զննվել են տնօրենի կողմից ստեղծված մասնագիտական խմբի կողմից և տրվել է մասնագիտական եզրակացություն։ Ի լրումն, ես նույնպես գնացել ստուգել եմ, որ ծառերն իրոք վթարային են՝ կարգադրելով հատումից առաջ ծառերի վրա փակցնել հատման մասին որոշում։
Նշեմ, որ այգու՝ զրոյականին մոտ բյուջեն թույլ չէր էլ տալիս, որ այգու ողջ տարածքում ցրված տասնամյակների թերի ոռոգման կամ դրա բացակայության արդյունքում չորացած ծառերը միանգամից հատվեին։ Վստահաբար, հիմա էլ կան վթարային ծառեր, որոնք կարող են վտանգ ներկայացնել այցելուների համար և հեռացման կարիք ունեն։ Դա նորմալ գործընթաց է։
3. Հատված կաղնիները գտնվում են այգու չոռոգվող և քիչ այցելվող հատվածում՝ ծայրամասում և նրանց հատման առաջնահերթությունն ինձ համար հասկանալի չէ։ Դրանց կենսունակության վերաբերյալ հեռվից կարծիք չեմ կարող հայտնել»։