«Ունենք մանկավարժներ, որոնք դպրոցում ոչ թե դասավանդմամբ են զբաղվում, այլ քաղաքականությամբ»․ Մարինա Ղազարյանը՝ Ժաննա Անդրեասյանին

«Գաղտնիք չէ, որ ունենք տնօրեններ, ուսմասվարներ, մանկավարժներ, որոնք երեխաներին ուղղորդում են և ոչ թե զբաղվում են դասավանդմամբ, այլ քաղաքականությամբ»,- այս մասին ԱԺ-Կառավարություն հարցուպատասխանի ժամանակ, դիմելով ԿԳՄՍ նախարար Ժաննա Անդրեասյանին, նշեց «Քաղաքացիական պայմանագիր» խմբակցության պատգամավոր Մարինա Ղազարյանը և հետաքրքրվեց՝ ի՞նչ է արվել դպրոցներն ապաքաղաքականացնելու համար։

«Օրենսդրությամբ ամրագրված է, որ կրթական հաստատություններում քաղաքական գործունեությունը արգելվում է, և եթե որևէ մեկը զբաղվում է նման գործունեությամբ, սա ուղիղ հիմք է համապատասխան գործընթաց սկսելու համար»,- նշեց Անդրեասյանը՝ հավելելով, որ նման ահազանգեր ստանում են, որին հաջորդում են աշխատանքից ազատումներ։