«Հայաստանն ստանձնել է պարտավորություններ` ապաշրջափակել Ադրբեջանի արևմտյան շրջանները Նախիջևանի հետ կապող տրանսպորտային հաղորդակցությունները». Ադրբեջանի ԱԳ

Հայաստանը, եթե շահագրգռված է տարածաշրջանային հաղորդակցությունների բացմամբ, պետք է գործնական քայլեր ձեռնարկի այս ուղղությամբ։ Այս մասին ասվում է Ադրբեջանի արտաքին գործերի նախարարության մամուլի քարտուղար Այհան Հաջիզադեի մեկնաբանության մեջ՝ կապված ՀՀ վարչապետ Նիկոլ Փաշինյանի տրանսպորտային հաղորդակցության մասին հայտարարության հետ։
Թշնամի երկրի գերատեսչության ղեկավարի հայտարարության մեջ ասվում է. «Հայաստանը, որը շուրջ 30 տարի օկուպացված է պահել Ադրբեջանի ինքնիշխան տարածքները և շրջափակել Նախիջևանի Ինքնավար Հանրապետությունը, 44-օրյա պատերազմից հետո դրական ներդրում չի ունեցել տարածաշրջանում հաղորդակցությունների բացման գործընթացում:

...Չնայած Հայաստանի ստանձնած պարտավորություններին՝ ապաշրջափակել Ադրբեջանի արևմտյան շրջանները Նախիջևանի հետ կապող տրանսպորտային հաղորդակցությունները, Երևանը դեռևս չի կատարել դրանք։

Առաջարկելով երկար և բարդ երթուղիներ, որոնք դժվար է գործնականում իրականացնել, Հայաստանը փորձում է ուշադրությունը շեղել գործընթացից և իր պարտավորություններից: Եթե ​​Երևանն իսկապես շահագրգռված է հաղորդակցությունների բացմամբ, ապա նա չպետք է խուսափի իր պարտավորություններից, այլ գործնական քայլեր ձեռնարկի, որոնք համապատասխանում են տարածաշրջանի նոր իրողություններին: