«Ամրագոտին չկապելու կամ հեռախոսով խոսելու դեպքում 1 միավորը դառնում է 1․5». Արմեն Խաչատրյան

Խորհրդարանը քննարկում է մի խումբ ՔՊ-ականների կողմից ներկայացված Վարչական իրավախախտումների վերաբերյալ ՀՀ օրենսգրքում փոփոխություններ կատարելու նախագիծը: «Տուգանային 9 միավորի փոխարեն կսահմանվի 13 միավոր, միաժամանակ խստացվում են այն խախտումների համար պատասխանատվության միջոցները, որոնք վերաբերվում են անվտանգությանը»,- նշել է հիմնական զեկուցող Արմեն Խաչատրյանը: «Կնշեմ այն յոթ իրավախախտումները, որոնց դեպքում բալերի թեթև բարձրացում է արվել, որպեսզի համարժեքությունը պահվի 13 բալի. դա՝ ապակիների լուսաթափանցելիության կանոնների խախտումն է. մեկ անգամ արձանագրվելուց հետո եթե կրկին անում է, 3 բալ հանվում է նրա բալային համակարգից: Մյուսը, ամրագոտիների 1 տուգանային միավորը դառնում է 1.5, հեռախոսով օգտվելու դեպքում՝ 1 միավորը դառնում է 1.5, բաժանարար գոտի հատելը՝ 2 միավորը դառնում է 3, հանդիպակաց երթևեկելի գոտի դուրս գալը՝ 3 միավորը դառնում է 4, ոչ սթափ վիճակում վարելը՝ 4 միավորի փոխարեն դառնում է 5, և ծխախոտի օգտագործման դեպքում 1.5 բալը փոխարինվում է 2-ով: Մնացած 20 իրավախախտումներով որևէ փոփոխություն չի արվել»,- ասել է Խաչատրյանը: