«Բելառուսը չի կարող իր քաղաքացուն արտահանձնել այլ պետության». Էդմոն Մարուքյան

ԼՀԿ ղեկավար Էդմոն Մարուքյանը ֆեյսբուքյան եթերով անդրադարձել է ՀՀ և Բելառուսի քաղաքացի հանդիսացող բլոգեր Բելլայի ձերբակալությանը Բելառուսում՝ Ադրբեջանի պահանջով՝ «Ադրբեջանի իշխանություններին զրպատելու համար»:

Էդմոն Մարուքյանն ընդգծել է, որ Բելառուսը չի կարող իր քաղաքացուն արտահանձնել այլ երկրի. «Եթե Ադրբեջանի պահանջով ՀՀ քաղաքացուն Բելառուսը հանձնի, նա կհայտնվի Ռուբեն Վարդանյանի և մյուս հայրենակիցների կողքին և կդատվի Ադրբեջանում: Բայց իմ ուսումնասիրությամբ՝ Բելառուսի օրենսդրությամբ արգելված է իր քաղաքացուն արտահանձնել, էքստրադիցիայի ենթարկել այլ պետություններին, որքան էլ քրեական գործեր լինեն այնտեղ հարուցված: Ըստ էության՝ Բելառուսը նրան չի կարող արտահանձնել Ադրբեջանին: Բայց կարող են մարդուն դատել հենց Բելառուսում»,- նշել է Մարուքյանը՝ հավելելով, որ ՀՀ-ն պետք է զբաղվի այդ հարցով՝ որպես իր քաղաքացու հետ կապված հարց։