«Սեպ մի խրեք Հայաստանի ու Սփյուռքի միջև». Կարեն Հովհաննիսյան

Ռազմական փորձագետ Կարեն Հովհաննիսյանի ֆեյսբուքյան գրառումը․ «Մի արեք նման բան, սեպ մի խրեք Հայաստանի ու Սփյուռքի միջև․․․
Վերջին օրերին աչքովս ընկավ մի քանի գրառում, թե բա Հայաստանի հայեր, ինչ եք մտածում, օգնություն ուղարկեք ամերիկաբնակ հայերին, թե բա իրենք 30 տարի ձեզ են օգնել և այլն․․․
Այն, որ մեր աշխարհասփյուռ հայությունն ամեն անգամ հայտնվում է դժբախտությունների կիզակետում, մեզ այլևս մտածելու տեղիք է տալիս Հայրենիք վերադառնալու համար։ Պատերազմներ Սիրիա, Լիբանան, Ուկրաինա, Ռուսաստան և այլուր, որտեղ կրկին հայությունն է տուժում, հիմա էլ այս գրողի տարած ամերիկյան հրդեհները։ Բայց այս դժբախտություններն այլ հարթակ տեղափոխելը, մեղմ ասած, տեղին չէ․․․
Աշխարհասփյուռ Հայությունը երկար ու ձիգ տարիներ օգնել են իրենց պետությանը, պետականությանը, իրենց Հայրենիքին։ Ապրել են այլ երկրում, աշխատել, արարել, հարկ մուծել այլ երկրում, բայց նաև բաժին են հանել Հայրենիքին, իսկ Հայրենիքը ԲՈԼՈՐԻՆՍ է․․․ Հայաստանում ապրող Հային եկեք երեսով մի տվեք այդ օգնությունը, Հայաստանում ապրող Հայն էլ իր զավակի կյանքով, իր կյանքով է պաշտպանում Հայրենիքը։ Եկեք դուրս եկեք այդ վտանգավոր, թշնամու համար ձեռնտու դիրքից, որը բաժանում, պառակտում է հայությանը․․․ Աստված պահապան Հային, աշխարհի որ անկյունում էլ լինի, իսկ մեր բոլորիս Հայրենիքին՝ հզորություն, որ էլ ոչ ոքի օգնության կարիքը չունենա, այլ ինքը օգնի իր զավակներին․․․
Մեզ միասնություն է պետք, ոչ թե պառակտում․․․»։