«Սիրիայում ռազմական-իսլամիստական հեղափոխությունը Թուրքիան իրականացրեց մի քանի դրդապատճառով»․ Հայկ Մարտիրոսյան

Քաղաքագետ Հայկ Մարտիրոսյանի ֆեյսբուքյան գրառումը․ «Սիրիայում ռազմական-իսլամիստական հեղափոխությունը Թուրքիան իրականացրեց մի քանի հիմնական դրդապատճառով:
Դրանցից ամենակարևորներից մեկը քրդերի հարցը լուծելն էր և Սիրիայի հյուսիսում նրանց ինքնավարությունը վերացնելն ու էթնիկ զտման ենթարկելը: Դեմոկրատների օրոք դա անհնար էր լինելու: Հիմա, երբ ԱՄՆ-ում Սպիտակ Տունն այլևս ոչ մի փաստացի իշխանություն կամ անկյունաքարային որոշումներ չի կարող ընդունել, իսկ հայտնի է, որ հաջորդ վարչակազմը Թրամփինն է լինելու՝ Թուրքիան հերթական անգամ ճշգրտագույն ժամանակային հաշվարկ կատարեց՝ գրավելով Սիրիան:
Հիմա եկել է քրդերին ջախջախելու ժամանակը: Ինչը և բարեհաջող արվում է: Դեմոկրատների օրոք առավելագույնը կարվի՝ ինչն այսօր հնարավոր է, իսկ Թրամփի օրոք, նոր վարչակազմը, որ ոչ միայն արդեն Թուրքիայի կողմից կատարածի փաստի առաջ կկանգնի, այլև արդեն իսկ հայտարարել է, որ քրդերին սատարումը թուլացնելու է և որը քրդերին մեկ անգամ արդեն դավաճանելու հայտնի փորձ ունի, լուռ կհետևի քրդերի մաքրմանը իրենց հայրենիքից:
Ռուսներն ու Հայաստանում նրանց շահերի գործակալներն էլ կսկսեն բարբաջել թե իբր ԱՄՆ-ը «հերթական անգամ դավաճանեց» իր դաշնակիցներին: Դա կասեն, որ ծածկեն Ռուսաստանի իսկական դավաճանությունների հսկայական շարանը:
Թրամփն, իհարկե, ԱՄՆ-ը չէ և չի շարժվում ամերիկյան քաղաքականության տրամաբանությամբ, այլ միայն՝ սեփական անձնական և այնպես չէ, որ որևէ բան ԱՄՆ շահերից ելնելով է անում: Բայց դա ո՛չ Հայաստանի ծախուներին ու թշնամական լաքեյներին է հետաքրքիր, ո՛չ էլ, մեծ հաշվով՝ այն զանգվածախմբակին, որին ժամանակին «ժողովուրդ» էինք կոչում»։