Չինաստանում մոտ 5000 տարեկան դամբարան է հայտնաբերվել

Կենտրոնական Չինաստանի Հենան նահանգում հետազոտողները հայտնաբերել են մոտ 5000 տարվա դամբարան, որը կօգնի ուսումնասիրել չինական քաղաքակրթության ակունքները, հայտնում է Xinhua գործակալությունը։
«Մ27-ի դամբարանը Դաուենկուի մշակույթի մեծ դամբարան է, որի մակերեսը կազմում է 17 քառակուսի մետր, դատելով նրա բնութագրերից՝ այնտեղ թաղված անձը, ենթադրաբար, կարող էր լինել հնագույն միապետ»,- գրում է հրատարակությունը։ Հաղորդվում է, որ դամբարանը հայտնաբերվել է Շանգկիու քաղաքում։ Այնտեղ եղել է 350 հնագույն մասունք, այդ թվում՝ հասպիսից և կերամիկայից պատրաստված իրեր, խոզերի ստորին ծնոտներ, որոնք, հավանաբար, հարստության խորհրդանիշ են եղել, և փղոսկրից զարդեր։ Թաղման չափերը և արտեֆակտների քանակը ցույց են տալիս, որ այն Դավենկու մշակույթի ամենամեծ թաղումներից մեկն է:
«Այս հայտնագործությունը ցույց է տալիս, որ Վանչժուանգի ավերակները սովորական բնակավայրեր չեն, այլ նախապատմական Հուայիի հնագույն թագավորության մայրաքաղաքը»,- ասել է պատմության ամբիոնի դոցենտ Չժու Գուանխուան:
2024 թվականին այս հնավայրը պեղող հնագետները հայտնաբերել են ավելի քան 45 դամբարան, արտեֆակտներ, որոնք վկայում են թաղվածների բարձր կարգավիճակի մասին։
Դավենկու մշակույթը մի խումբ համայնքների պայմանական անվանումն է, որոնք ապրել են նեոլիթյան դարաշրջանում ժամանակակից Շանդուն, Անհույ, Հենան և Ցզյանսու նահանգների տարածքներում 4100-2600 թվականներին: Հայտնաբերված արտեֆակտները ցույց են տալիս, որ այն ժամանակվա հասարակության մեջ արդեն գոյություն ուներ սոցիալական շերտավորում: