«Հատվել է ևս մեկ կարմիր գիծ». Իսրայելը հարվածել է Լիբանանում ՄԱԿ-ի խաղաղապահ կենտրոնակայանին

Լիբանանում ՄԱԿ-ի ժամանակավոր ուժերի բազաները, որոնք տեղակայված են երկրի հարավում՝ Իսրայելի հետ սահմանին, հայտնվել են իսրայելական զինվորականների կրակի տակ։ Ինդոնեզիայի զորախմբի երկու խաղաղապահ վիրավորվել է։ Գնդակոծության են ենթարկվել իտալական 2 և Ինդոնեզիայի հսկողության տակ գտնվող 1 բազա։ Իտալացի զինվորականները չեն տուժել։ Դիրքերն առանձնապես չեն տուժել, քանի որ հրետակոծությունն իրականացվել է նրանց շրջապատող առարկաների, մասնավորապես՝ արտաքին հսկողության տեսախցիկների վրա։
Ֆրանսիայի ԱԳՆ-ն այս միջադեպի առնչությամբ հայտարարության մեջ նշել է, որ Փարիզը բացատրության է սպասում: «Ֆրանսիան իր խորը մտահոգությունն է հայտնում իսրայելական զորքերի կողմից ՄԱԿ-ի խաղաղապահների դիրքերի գնդակոծման կապակցությամբ և դատապարտում է խաղաղապահների վրա հարձակվելու ցանկացած փորձ։ Այս հարցի վերաբերյալ բացատրություններ ենք սպասում իսրայելական կողմից: Ֆրանսիան վերահաստատում է իր կոչը՝ անհապաղ և երկարաժամկետ հրադադար հաստատելու Լիբանանում»,- ասվում է կոմյունիկեում։

Իտալիայի վարչապետ Ջորջիա Մելոնին անընդունելի է անվանել ՄԱԿ-ի ժամանակավոր ուժերի բազայի վրա հարվածը և բողոք է հայտնել Թել Ավիվին։

«Իտալիայի կառավարությունը պաշտոնական բողոք է ներկայացրել Իսրայելի իշխանություններին և վճռականորեն հայտարարել, որ այն, ինչ կատարվում է ՅՈՒՆԻՖԻԼ կոնտինգենտի բազայի մոտ, անընդունելի է»,- ասվում է վարչապետի մամուլի ծառայության հաղորդագրության մեջ։ Այս առիթով պաշտպանության նախարար Գիդո Կրոզետտոն զրույցի է կանչել Իտալիայում Իսրայելի դեսպանին։

Ավելի վաղ Իտալիայի արտաքին գործերի նախարար և փոխվարչապետ Անտոնիո Տայանին հայտարարել էր, որ իսրայելական կողմից երաշխիքներ է ստացել, որ խաղաղապահ կոնտինգենտը, որի կազմում ընդգրկված է մոտ 1000 իտալացի, ապահովվելու է անվտանգության երաշխիքներով։

ԵՄ դիվանագիտական ​​ծառայության ղեկավար Ժոզեպ Բորելը հայտարարել է, որ ոչ մի արդարացում չկա իսրայելական բանակի կողմից Լիբանանում ՄԱԿ-ի խաղաղապահների դիրքերի գնդակոծման համար, ևս մեկ կարմիր գիծ է հատվել։ «Լիբանանում վտանգավոր կերպով հատվել է ևս մեկ կարմիր գիծ, ​​երբ իսրայելական ուժերը կրակում են ՄԱԿ-ի խաղաղապահների ուղղությամբ, որոնց դիրքերը հայտնի էին: Մենք դատապարտում ենք այս անընդունելի արարքը, որի համար ոչ մի արդարացում չի կարող լինել»,- գրել է Բորելը X-ում (նախկինում՝ Twitter):