Խորտակված Argos Georgia-ի անձնակազմի անդամների մի մասին հաջողվել է փրկել, կան զոհեր

Ատլանտյան օվկիանոսի հարավում շարունակվում են որոնողափրկարարական աշխատանքներն այն վայրում, որտեղ այսօր խորտակվել է Argos Georgia ձկնորսական նավը: Նշենք, որ նավի անձնակազմի անդամների մեջ ռուսներ են եղել: Որոնողափրկարարական աշխատանքները բարդանում են եղանակային պայմանների պատճառով։ Այս մասին ՏԱՍՍ-ին հաղորդել է Լոնդոնում ՌԴ-ի դեսպանատունը:

Վերջին տեղեկությունների համաձայն՝ Սուրբ Հելենայի, Համբարձման և Տրիստան դա Կունյայի կղզիների դրոշով նավարկող Argos Georgia նավը հուլիսի 22-ին աղետի ազդանշան է տվել՝ ջուր լցվելու պատճառով։ Այն ժամանակ այն գտնվում էր Ֆոլքլենդյան կղզիներից (Մալվինաս) 200 ծովային մղոն դեպի արևելք։ Այնուհետև ողջ անձնակազմը լքել է նավը՝ օգտագործելով փրկարար լաստանավեր։

Հուլիսի 24-ի առավոտվա դրությամբ անձնակազմի 14 անդամներ փրկվել են, 9-ը զոհվել են, 4-ը համարվում են անհետ կորած։ Զոհվածների թվում կա 3 ռուս, ևս մեկ ՌԴ քաղաքացի համարվում է անհետ կորած։
Ինչպես գրում է The Guardian թերթը, Argos Georgia-ն, որը շահագործվում էր նորվեգա-բրիտանական Argos Froyanes Ltd. ընկերության կողմից, հուլիսի 21-ի երեկոյան դուրս է եկել Սթենլի նավահանգստից (Ֆոլկլենդյան կղզիների վարչական կենտրոն) դեպի Հարավային Ատլանտիկայի ձկնորսական տարածք: Աղբյուրի տվյալներով՝ 2018 թվականին կառուցված նավի անձնակազմը բախվել է ուժեղ քամիների, որոնց արագությունը գերազանցել է ժամում 65 կմ-ը, և 7 մետրանոց ալիքների։