Էլեկտրամեքենաների՝ ԱԱՀ-ից ազատելու արտոնությունը կերկարաձգվի

ԱԺ «Քաղաքացիական պայմանագիր» խմբակցության պատգամավոր Արսեն Թորոսյանի ֆեյսբուքյան գրառումը. «Կառավարությունն այսօր որոշում ընդունեց ԱԺ ուղարկել օրենքի նախագիծ, որով էլեկտրական մեքենաների ներմուծման ԱԱՀ-ից ազատելու արտոնությունը կերկարաձգվի մինչև 2025 թվականի հունվարի 1-ը, ինչը շատ ճիշտ որոշում է, քանի որ կշարունակի խթանել էլեկտրական մեքենաների ներմուծումը և շահագործումը։
Հաշվի առնելով այս հնարավորությունը, կարծում եմ պետք է սահմանել նաև ներմուծվող մեքենաների տարիքը, որոնք կարող են օգտվել այդ արտոնությունից, որպեսզի հնարավորինս նոր մեքենաներ ներմուծվեն մեր երկիր։ Որպես օրինակ կարող է լինել ձեռք բերման պահին 3 կամ 5 տարեկան շեմը, որը կարող է տալ այդ արտոնությունը կամ հնարավորություն տալ կիրառելու տարբերակված ԱԱՀ՝ կախված նրանից, թե ներմուծվող մեքենան քանի տարեկան է։ Եվ ընդհանրապես կարծում եմ, որ խրախուսող գործիքների կիրառմամբ պետք է խթանենք մեր ավտոպարկի թարմացումը։
Ազգային ժողովում այս քննարկումը իհարկե կունենանք կառավարության մեր գործընկերների հետ, բայց կարծում եմ հանրային բանավեճն էլ կօգնի արդյունավետ որոշումների կայացմանը»: