«Ակնհայտ է, որ պարենային ապրանքների պակասուրդ լինելու է»․ փոխվարչապետ

ԱԺ-կառավարություն հարցուպատասխանի ժամանակ «Քաղաքացիական պայմանագիր» խմբակցության պատգամավոր Սերգեյ Բագրատյանը հետաքրքրվեց, թե արդյոք Ուկրաինայում պատերազմով պայմանավորված պարենային ապրանքների արտահանման, տեղական արտադրության հետ կապված ի՞նչ միջոցառումներ են իրականացվելու:

Ի պատասխան՝ ՀՀ փոխվարչապետ Մհեր Գրիգորյանն ասաց, որ ԵԱՏՄ խորհրդի նիստ է տեղի ունեցել, որի ընթացքում քննարկվել է այդ հարցը․ «Մենք որքան էլ մտածենք, այնուամենայնիվ, ապրանքների շարժ առնվազն ԵԱՏՄ տարածքում պետք է տեղի ունենա, որպեսզի լիարժեք խնդիրները լուծվեն ու դա միայն Հայաստանին չի վերաբերում: Կա հստակ պայմանավորվածություն, որ մինչև մարտի 25-ը հանձնաժողովը պետք է փոխադարձ բալանսների հաշվարկ իրականացնի ու սահմանի այն քվոտավորված հոսքը, որն անհրաժեշտ կլինի ԵԱՏՄ երկրների պարենային անվտանգությունն ապահովելու համար»։

«Բոլոր հնարավոր խթանները պետք է աշխատեցնել, որպեսզի լոկալ արտադրությունը, մասնավորապես, առաջին անհրաժեշտության ապրանքների, սննդամթերքի մասով խթանվի, դա դոգմա է, որովհետև տարածաշարջանում ակնհայտ է, որ պակասուրդ է լինելու»,- նշեց փոխվարչապետը: