«Ո՞վ է որոշել, որ Վայոց ձորի երիտասարդությունը պետք է իր բնակավայրում կրթության իրավունքից զրկվի»․ Անի Սամսոնյան

Նախկին պատգամավոր Անի Սամսոնյանը ֆեյսբուքյան իր էջում գրում է. «Հիմա Հայաստանում կրթությունը խնդի՞ր է, թե՞ խնդիր չէ:
Վերջին սոցիալական հարցումները վկայում են, որ քաղաքացիները Կառավարության գործունեության առաջնահերթություններում առաջինը նշում են աշխատատեղերի ստեղծումը, երկրորդը՝ կրթության բարելավումը:
Բոլորը հաստատական նշանով պնդում են, որ կթության հարցը լուրջ է: Հատկապես՝ իշխանությունը:
Բայց այդ ուղղությամբ գործողությունները առնվազն անհասկանալի ու ոչ համոզիչ են:
Հայաստանի պետական տնտեսագիտական համալսարանի Եղեգնաձորի մասնաճյուղը փակում եք ու ոչ մի իրազեկում կամ հիմնավորում չեք ներկայացնում շահառու ուսանողներին:
Հասկացանք, մարզերի զարգացման հարցը տարեցտարի բարդանում է՝ հաշվի առնելով դեմոգրաֆիան, ռեսուրսի խնդիրը և անվտանգության հետ կապված անորոշությունները: Բայց մենք տարածքային համաչափ զարգացման խնդիրը ի՞նչ ռազմավարությամբ ենք լուծում. ենթակառուցվածքները և տեղական կենսագործունեության գրավչությունը բարձացնելու նոր լուծումներ փնտրելո՞վ, թե՞ անբարեխիղճ բժշկի պես բժշկական դանակի՝ փրթել-թափել մեթոդներով:
Ո՞վ է որոշել, որ Վայոց Ձորի երիտասարդությունը պետք է իր բնակավայրում կրթության իրավունքից զրկվի, որովհետև կան խնդիրներ: Կառավարության խնդիրը իրավունքը պաշտպանելով խնդրի լուծումն է և ոչ թե հակառակը:
Հետո, որ երիտասարդությունը գալիս է ստիպված Երևան ուսանելու, ասում են՝ փախչում են իրենց ծննդավայրից:
Սխալ որոշում է և ոչ մի հուսադրող բան չկա այս ամեն ինչի մեջ: Եթե Եղեգնաձորում ապագա չկա, այդպես էլ ասեք»: