«Բարեկամավանի միջնակարգ դպրոցն ունի 13 աշակերտ». Ոսկան Սարգսյան

Լրագրող Ոսկան Սարգսյանը ֆեյսբուքյան իր էջում գրել է. «Բարեկամավանի միջնակարգ դպրոցն ունի 13 աշակերտ, 1-ին, 3-րդ, 5-րդ և 6-րդ դասարաններ չկան. 1970-ական թվականների կեսերին Բարեկամավանի ութամյա դպրոցն ունեցել է շուրջ 350 աշակերտ, իսկ գյուղի 9-10-րդ դասարանի աշակերտները Նոյեմբերյանի շրջանի այլ բնակավայրերի միջնակարգ դպրոցներում էին սովորում։

Հայաստանի անկախացումից հետո ավելի թափ առած արտագաղթի հետևանքով նվազել է գյուղի բնակիչների, նաև՝ դպրոցի աշակերտների թիվը։ 2017 թվականին Բարեկամավանի միջնակարգ դպրոցն ունեցել է 17 աշակերտ, վաղը՝ սեպտեմբերի 1-ին, այդ դպրոց կհաճախի 13 աշակերտ։

Ստավրոպոլի հայ համայնքի հանգանակած 8,5 միլիոն դրամը բավարար չի եղել Բարեկամավանի դպրոցի շենքի տանիքը նորոգելու համար, տանիքի կեսն է նորոգվել, այդ գործն անցյալ տարվա սեպտեմբերից կիսատ է։ Զանազան պաշտոնյաներ պետական բյուեջից բարձր աշխատավարձ ստանալուց զատ՝ պարբերաբար մեծ պարգևավճարներ են ստանում, իսկ սահմանամերձ, հեռավոր Բարեկամավանի դպրոցի շենքի տանիքը նորոգելու համար պետական բյուջեն գումար չի տրամադրել»։