Չընդունված դիմորդներն ու նրանց ծնողները Կառավարության շենքի դիմաց շարունակում են բողոքի ակցիան․ ՈՒՂԻՂ ՄԻԱՑՈՒՄ

Այսօր չորրորդ օրն է, ինչ չընդունված դիմորդներն ու ծնողները բողոքի ակցիա են իրականացնում՝ պահանջելով ընդունելության նոր կարգի հետևանքով առաջացած խնդրի վերանայում։

«Փոխնախարարը ոնց որ փափուկ բարձ փորձեր դնել մեր գլխի տակ»,- ասաց կառավարության շենքի դիմաց հավաքված ծնողներից մեկը, որը երեկ, ի թիվս այլ ծնողների և չընդունված դիմորդների, հանդիպել էր ԿԳՄՍ փոխնախարար Գրիշա Թամրազյանին հետ։

«Մենք պայքարելու ենք, որ հասնենք մեր սահմանադրական իրավունքի պաշտպանությանը։ Մեր երեխաները ստացել են բարձր գնահատականներ ու նրանք պետք է դառնան ուսանող։ Ես հավատում եմ, որ վարչապետը մեր խնդրին լուծում կտա։ Դրա համար ես խնդրեցի, որ տեղեկացնեն նրան, և եթե հնարավոր է՝ կառավարության նիստից հետո մեզ ընդունի»,- ասաց ծնողներից մեկը։
Լրագրողի հարցին, թե ինչպես են արձագանքել իրենց խնդրանքին, և արդյո՞ք հույս ունեն հանդիպել վարչապետին՝ կառավարության նիստից հետո, ծնողը պատասխանեց, որ եթե հույս չունենային՝ չէինք սպասի։