ՀՖՖ-ն ներողություն է խնդրել Մխիթարյանից և Գյուլբուդաղյանցից

ՀՖՖ-ն պաշտոնական մեկնաբանություն է տարածել «The Best FIFA Football Awards»-ի քվեարկությանը Հայաստանի հավաքականի գլխավոր մարզիչ Արմեն Գյուլբուդաղյանցի և Հայաստանի հավաքականի ավագ Հենրիխ Մխիթարյանի չմասնակցելու վերաբերյալ․ «Ֆուտբոլային հանրության հարգելի՛ անդամներ, երեկ Իտալիայի Միլան քաղաքում կայացավ «The Best FIFA Football Awards» ամենամյա մրցանակաբաշխությունը: Ըստ կանոնակարգի՝ մրցաշրջանի լավագույն ֆուտբոլիստի և մարզչի անվանակարգում քվեարկում են ՖԻՖԱ-ի անդամ ասոցիացիաների ներկայացուցիչները (ազգային հավաքականի գլխավոր մարզիչը, ավագը և մեդիայի 1 ներկայացուցիչ):

2019 թ. օգոստոսին ՀՖՖ-ն ունեցավ սերվերի հետ կապված տեխնիկական խնդիրներ Հենց այդ ժամանակահատվածում է ՖԻՖԱ-ն ուղարկել քվեարկության համար նախատեսված նամակ-ձևաթուղթը, որը չի հասել հասցեատիրոջը և հենց այդ պատճառով էլ ՀՖՖ-ն չի ներկայացրել քվեարկության իր տարբերակները:

Հայաստանի ֆուտբոլի ֆեդերացիան պաշտոնապես հայտարարում է, որ չկա որևէ միտում՝ հատկապես հաշվի առնելով, որ նախորդ տարիներին ՀՖՖ-ն մշտապես ներկայացրել է քվեարկության իր տարբերակները:

Հայցում ենք ֆուտբոլային հանրության, ինչպես նաև Հայաստանի ազգային հավաքականի գլխավոր մարզչի և ավագի ներողամտությունը և հավաստիացնում, որ հետագայում հետամուտ կլինենք քվեարկության պատշաճ իրականացմանը»։