Երևան`   +6 °C
Այսօր`   Երեքշաբթի, 19 նոյեմբերի, 2019 թ.

«Իշխանությունների առջև դժվարին խնդիր կա». Նարինե Դիլբարյան

132
Չորեքշաբթի, 11 սեպտեմբերի, 2019 թ., 04:35
«Իշխանությունների առջև դժվարին խնդիր կա». Նարինե Դիլբարյան

Լեզվաբան, բանասիրական գիտությունների թեկնածու Նարինե Դիլբարյանը ֆեյսբուքյան իր էջում գրել է. «Նիկոլ Փաշինյանը վճիռ կայացրեց՝ բնապահպաններին ու նրանց աջակցող ժողովրդին առաջարկեց ապաշրջափակել Ամուլսարը, իր կառավարությունը չունի հիմքեր արգելափակելու «Լիդիանի» գործունեությունը: Առաջին ոչ ժողովրդահաճ որոշումը, որը կարող է հանգեցնել վարկանշային անկման, թիմում արդեն հակադիր տեսակետներ կան, սահմանազատվելու ժամանակն է, կոնսենսուս չկա: Դժվար է կանխատեսել, որ բնապահպանները և Ամուլսարի շահագործման հակառակորդները միանգամից կզիջեն դիրքերը: Ուստի իշխանությունների առջև դժվարին խնդիր կա՝ չտրվել ուժ կիրառելու գայթակղությանը, որին այնպես սպասում են ռևանշի ձգտող հին ուժերը, որոնց համակարգը դեռ կա և գործում է նորի իսպառ բացակայության պատճառով: Հանգուցալուծման քաղաքական ուղի է պետք, տագնապներ ու մտահոգություններ ունեցող հանրության հետ երկխոսություն-քննարկում է պետք, այս մի լայվը ոչինչ չի հանգուցալուծի, հանրությունը պահանջում է ոչ պոպուլիստական,գաղափարական երկխոսություն իր ձևավորած իշխանության հետ՝ հանուն տնտեսապես զարգացող, արդիական, արդյունաբերական, բայց և էկոլոգիապես անվտանգ պետության կառուցման նպատակի, իսկ դա պահանջում է հստակ գաղափարաբանություն, ոլորտային ծրագրեր, մասնագետների ներգրավում ու քաղաքական հաստատակամություն: Եկել է գաղափարախոսության ճշգրտման ժամանակը, մեզ ոչ թե կարգախոսային տնտեսական հեղափոխություն է պետք, այլ մասնագիտորեն հիմնավորված զարգացման ծրագիր, տնտեսության կառավարման մեջ պետության մասնակցության դերի մեծացմամբ, որն անմիջաբար կնշանակի քաղաքացիների դերի մեծացում»: