«Ձեր նշանակած ոստիկանապետին ասում են լակոտ, ձեզնից ոչ մեկ նրան չի պաշտպանում». Արման Բաբաջանյան

«Ձեր նշանակած ոստիկանապետին դատարանում ասում են լակոտ, ձեզնից ոչ մեկ նրան չի պաշտպանում, համարձակություն չի ունենում նրան զորավիգ լինել: Երեկ էլ Պաշտպանության նախարարին էին հաթաթա տալիս: Մինչև ե՞րբ»,- ԱԺ-ում հայտարարեց «Լուսավոր Հայաստան» խմբակցության պատգամավոր Արման Բաբաջանյանը՝ անդրադառնալով նախօրեին «Իմ քայլը» խմբակցության որոշ պատգամավորների ելույթներին, ովքեր ընդդիմությանը մեղադրում էին անընդհատ խոսելու մեջ՝ նշելով, թե արդեն գործելու ժամանակն է: «Parla՝ խոսքից առաջացած խորհրդարանում մեր գործը խոսելն է, ձեր պատկերացրած գործը պետք է գործադիրն անի, մենք էլ մեր խորհրդարանով պետք է վերահսկենք նրանց աշխատանքը»,- ընդգծեց Բաբաջանյանը՝ անդրադառնալով մեկ այլ ելույթի. «Ի՞նչ այգի, ի՞նչ այգեպան, ի՞նչ հիմն, դրոշ, երբ պետականության համար կենսական այս ինստիտուտները չենք կարողանում միասնաբար պաշտպանել»,- շարունակեց նա:

Հիշեցնենք՝ Հայկ Կոնջորյանը երեկվա իր ելույթում ասել էր. «Կառավարությունը նման է այգեպանի, ով պետք է այգին մաքրի մոլախոտերից, պայքարի կրծողների և վնասակար միջատների դեմ․ դրանից հետո ծառերը պտուղներ կտան, անհավանական պտուղներ»: