Երևան`   +9 °C
Այսօր`   Երեքշաբթի, 17 նոյեմբերի, 2026 թ.

Շախմատ․ Սարգսյանը և Պետրոսյանն «Աէրոֆլոտ օփեն»-ի առաջատարներին հետապնդողների խմբում են

386
Երեքշաբթի, 27 փետրվարի, 2018 թ., 15:30
Շախմատ․ Սարգսյանը և Պետրոսյանն «Աէրոֆլոտ օփեն»-ի առաջատարներին հետապնդողների խմբում են

Մոսկվայում կայացել են «Աէրոֆլոտ օփեն» միջազգային մրցաշարի 7-րդ տուրի պարտիաները: 7-րդ տուրում 3-րդ հաղթանակն է տոնել Գաբրիել Սարգսյանը։ Ռուս գրոսմայստեր Կիրիլ Ալեկսեենկոյին հաղթելու համար Սարգսյանը 30-րդ քայլին 2 զինվորի դիմաց զոհաբերել է փիղը և, ստանալով որոշակի առավելություն, աստիճանաբար մեծացրել այն և 62-րդ քայլին մրցակցին ստիպել վայր դնել զենքերը: Առաջատարների խմբում ընթացող Տիգրան Լ. Պետրոսյանը սև խաղաքարերով ոչ-ոքի է խաղացել Վլադիսլավ Արտեմևի հետ: Իրենց պարտիաները հաշտությամբ են ավարտել նաև Մանուէլ Պետրոսյանն, Արամ Հակոբյանը և Շանթ Սարգսյանը: Հայկ Մարտիրոսյանը և Արման Միքայելյանը պարտություններ են կրել։ Այսպիսով, 7-րդ տուրից հետո աղյուսակը 5.5-ական միավորով գլխավորում են Վլադիսլավ Կովալյովը և Ամին Տաբատաբեյը: 5 շախմատիստ, որոնց թվում են Գաբրիել Սարգսյանը և Տիգրան Լ. Պետրոսյանը կիսում են 3-7-րդ հորիզոնականները: Մանուէլ Պետրոսյանը և Արամ Հակոբյանը վաստակել են 3.5-ական միավոր, Արման Միքայելյանը՝ 3, Հայկ Մարտիրոսյանը՝ 2.5, Շանթ Սարգսյանը՝ 2 միավոր: B մրցաշարում աղյուսակը 6 միավորով գլխավորում է Ռուսաստանի ներկայացուցիչ Միխայիլ Մոժարովը: Տիգրան Քոթանջյանը 5.5 միավորով կիսում է 2-9-րդ հորիզոնականները: C մրցաշարում աղյուսակը 6-ական միավորով գլխավորում են Չժաո Չէնսին և Գլեբ Ապրիշկոն: Մարկ Բասենցյանը 5 միավորով ընթանում է առաջատարներին հետապնդողների խմբում: