«2008թ. մարտի 1-ի առավոտյան ինչո՞ւ են հատուկ ջոկատայինները դուբինկեքով զխկել քնած մարդկանց». Ռուբեն Ռուբինյան

ԱԺ նորընտիր փոխնախագահ Ռուբեն Ռուբինյանը, դիմելով ընդդիմադիր պատգամավոր Լևոն Քոչարյանին, խոսեց նրա հոր՝ ՀՀ երկրորդ նախագահ Ռոբերտ Քոչարյանի ու Մարտի 1-ի մասին. «Ես միշտ ինձ մի փոքր վատ եմ զգում ձեր ներկայությամբ կամ ձեր հետ հեռակա զրուցելիս ձեր հոր մասին խոսել, որովհետև աշխարհի ամենահաճելի բանը չէ՝ որդուն ասել՝ ես համարում եմ, որ քո հայրը վատ քաղաքական գործիչ է, կամ վատ մարդ է: Բայց ստիպված եմ անել ու անում եմ այն պատճառով, որ դուք քաղաքական գործիչ եք ու այստեղ եք»,- ասաց Ռուբինյանը:

Անդրադառնալով Մարտի 1-ի վերաբերյալ Լևոն Քոչարյանի ելույթին՝ շարունակեց. «2008թ. մարտի 1-ի առավոտ վեցին Ազատության հրապարակում եղել ա մաքսիմում 100-200 մարդ, մեծ մասը՝ քնած: Ոչ մի բան չեն արել, քնած են եղել: Հատուկ ջոկատայինները եկել են, սկսել են բոլորին դուբինկեքով զխկել, լարել: Հիմա ասեք՝ էդ մարդիկ ի՞նչ էին արել»: