«Խաղասարքերը տեղադրվել են արդեն վնասված վիճակում». Արսեն Նիկողոսյան

Ակտիվիստ Արսեն Նիկողոսյանը ֆեյսբուքյան իր էջում լուսանկարներ է հրապարակել՝ կից գրառմամբ. «Սա Շինարարներ 10/1 և Արզումանյան 12 շենքերի բակի խաղահրապարակն է։
Այս բակում գտնվող հնացած ճոճանակներն ու կարուսելները դարձել են երեխաների և ծնողների ամենամեծ մտահոգություններից մեկը։ Խաղասարքերը վաղուց այլևս անվտանգ չեն, և դրանց պատճառով արդեն մի քանի անգամ երեխաներ վնասվածքներ են ստացել։
Առավել մտահոգիչ է այն, որ տվյալ խաղասարքերը տեղադրվել են արդեն վնասված վիճակում։ Սա լուրջ հարցեր է առաջացնում կատարված աշխատանքի որակի և պատասխանատու կառույցների վերահսկողության վերաբերյալ։ Ստացվում է, որ առաջնահերթությունը ոչ թե երեխաների անվտանգությունն է, այլ պարզապես ձևական աշխատանք կատարած երևալը։
21-րդ դարում անթույլատրելի է, որ երեխաները խաղան մաշված, վտանգավոր և հնացած խաղասարքերով, որոնք ամեն օր վտանգում են նրանց առողջությունն ու կյանքը։ Երեխաների սիրելի խաղահրապարակն այսօր վերածվել է վտանգավոր գոտու։
Պահանջում ենք Երևանի քաղաքապետարանից և բոլոր պատասխանատու կառույցներից անհապաղ արձագանքել այս խնդրին, ապամոնտաժել կյանքին վտանգ սպառնացող խաղասարքերը, պարզել պատասխանատուների գործողությունների օրինականությունն ու որակը և տեղադրել նոր, ժամանակակից ու անվտանգ խաղահրապարակ։
Երեխաների անվտանգությունը չի կարող լինել անտեսված կամ ձևական վերաբերմունքի առարկա։ Մինչև դժբախտ պատահար տեղի չունենա, պատասխանատուները պարտավոր են գործել»: