«Կտրիճ Ներսիսյանն արհամարհանք է ցուցաբերում լրագրողների նկատմամբ». Ալխաս Ղազարյան

ՔՊ-ական պատգամավոր Ալխաս Ղազարյանի ֆեյսբուքյան գրառումը․ «Կտրիճ Ներսիսյանն անտեսում է ոչ միայն ՀՀ օրենքները, այլև բացահայտ արհամարհանք է ցուցաբերում լրագրողների նկատմամբ։ Տպավորություն է, թե գործ ունենք սովետական չինովնիկի հետ։
Նրան մշտապես ուղեկցող մոտ երկու տասնյակ սևազգեստ մարդիկ այնպես են շրջապատում նրան, որ լրագրողներն ու հասարակ մարդիկ չկարողանան մոտենալ և հարցեր տալ։ Եռաբլուրում տեղի ունեցած տեսարանը դրա վառ վկայությունն է։
Լրագրողների բոլոր հարցերին նրանք նույն պատասխանն են տալիս՝ «այսօր այդ օրը չէ հարցերին պատասխանելու համար»։ Եվ դա կրկնվում է ամեն անգամ, երբ Կտրիճ Ներսիսյանը տարվա մեջ բացառիկ դեպքերում ստիպված դուրս է գալիս իր ճոխ նստավայրից։
Օրինակ՝ հունվարի 27-ին, հայրենիքի պաշտպանության համար զոհվածների հիշատակի օրը, նա կարող է ժողով անել և բարձրաստիճան հոգևորականի կարգալույծ հռչակել, բայց հինգ րոպե չի կարող հատկացնել լրագրողների հարցերին պատասխանելու համար։
Ու հարց է առաջանում․ իր կառավարման 26 տարիները՝ շուրջ 9 460 օր, արդյո՞ք այդ օրերի ընթացքում չգտնվեց գեթ մեկ օր, երբ Կտրիճ Ներսիսյանը կլիներ իր հոտի մեջ և կպատասխաներ նրանց հարցերին։
Այս վարքագիծը մի բանի մասին է վկայում՝ Կտրիճ Ներսիսյանը ասելիք չունի ոչ լրագրողներին, ոչ էլ հանրությանը»: