«Ի՞նչ մոտիվով է արցախյան շարժման «ԿԳԲ-ական ծագման» թեման շրջանառվում այլ «ասպարեզներում»»․ Հակոբ Բադալյան

Քաղաքական մեկնաբան Հակոբ Բադալյանի ֆեյսբուքյան գրառումը. «Երբ Նիկոլ Փաշինյանը և մերձիշխանական տարբեր խմբերը պարբերաբար շրջանառում են արցախյան շարժման «ԿԳԲ-ական ծագման» թեման, դրա մոտիվը միանգամայն հասկանալի է:
Անհասկանալի է, թե ի՞նչ մոտիվով է այդ թեման պարբերաբար շրջանառվում այլ «ասպարեզներում» կամ «շրջանակներում»:
Ընդ որում, էական չէ՝ «ծագման» այդ պնդումները կամ վարկածները իրական են, թե՞ ոչ: Էական չէ այն պատճառով, որ դա երբեք չի արժանանալու անառարկելի ապացուցման կամ հերքման, հետևաբար ընդամենը լինելու է հանրային միտքը «թափառականի» վերածող գործոններից մեկը:
Այն դեպքում, երբ հանրային օգտակարությունը պահանջում է այդ միտքը կենտրոնացնել շարժման արդյունքի վրա, որպես հանրային-քաղաքական-պետական պասիոնարության թեկուզ հարաբերական, բայց վկայություն, օրինակ, պատմություն:
Եվ, եթե քննարկվում են հետագայում պետական ու հանրային կյանքում թույլ տրված կոպիտ սխալները՝ իրավիճակային, համակարգային, խորքային, ապա հենց այդ պասիոնարության օրինակից մղվող համեմատականության մեջ, այլ ոչ թե «մայր օրինակն» էլ արժեզրկելու անհասկանալի մղումը:
Կրկնեմ, երբ այդ մղումով առաջնորդվում է ներկայիս իշխանությունը, դրա պատճառը հասկանալի է: Հասկանալի չէ, այլ հանրային-քաղաքական տիրույթներում այդ մղման պարբերական դրսևորումների հանգամանքը, այն էլ իբրև խորագիտության մի պանծալի դրսևորում»: