Իրավապահ մարմիններում սպասում են Փաշինյանի այցին. «Ժողովուրդ»

«Ժողովուրդ» օրաթերթը գրում է. «Մեր լավատեղյակ աղբյուրները փոխանցում են, որ իրավապահ մարմիններում այս օրերին շունչները պահած սպասում են Նիկոլ Փաշինյանի այցին՝ իրենց ղեկավարած գերատեսչություններ։

Բանն այն է, որ Նիկոլ Փաշինյանը որոշել է անձամբ այցելել տարբեր գերատեսչություններ, հանդիպումներ ունենալ աշխատակազմի և ղեկավար անձանց հետ, հարցեր տալ նրանց կատարած աշխատանքների,գրանցած արդյունքների վերաբերյալ։ Կարճ ասած՝ Փաշինյանը հաշվետվություն է պահանջում:

Մեր աղբյուրները նշում են, որ իրավապահները շատ լուրջ են պատրաստվում Փաշինյանի գալուն․ փաստաթղթեր են հավաքում, գրություններ պահանջում իրենց ենթականերից, որպեսզի Փաշինյանի բոլոր հարցերին պատասխան ունենան։

Կարելի է ասել, որ համակարգում կյանքը գործնական առումով կանգ է առել մինչև Փաշինյանի գալն ու գնալը։ Չի բացառվում, որ դրանից հետո լինեն պաշտոնանկություններ և ազատման դիմումներ:

Նշենք, որ Փաշինյանն արդեն այցելել է ՀՀ առողջապահության նախարարություն, իսկ երեկ՝ ՀՀ արդարադատության նախարարություն»։