«Լինելու եմ Մայր Աթոռ Սուրբ Էջմիածնում ոչ` որպես դիտորդ, այլ` որպես գիտակից քաղաքացի և հավատացյալ». Աստղիկ Ավետիսյան

Հայկական PR ասոցիացիայի նախագահ, ԵՊՀ դոցենտ Աստղիկ Ավետիսյանը ֆեյսբուքյան էջում գրել է․ «Դեկտեմբերի 18-ին ժամը 17։00-ին, ես լինելու եմ Մայր Աթոռ Սուրբ Էջմիածնում ոչ՝ որպես դիտորդ, այլ՝ որպես գիտակից քաղաքացի և հավատացյալ, որի համար սրբությունը սակարկման առարկա չէ։
Ժողովուրդը պարտավոր է պաշտպանել իր սրբությունները, երբ իշխանությունը հրաժարվում է իր սահմանադրական ու բարոյական պարտականությունից։ Երբ իշխանությունը ոչ թե պահպանում է հոգևոր անվտանգությունը, այլ դառնում է դրա խախտման աղբյուր, պատասխանատվությունը ամբողջությամբ ընկնում է հենց այդ իշխանության վրա։
Պետությունը պատասխանատու է բոլոր սադրիչ գործողությունների և դրանց հետևանքների համար՝ հատկապես այն դեպքում, երբ եկեղեցու ներքին գործերին միջամտելու անօրինական և վտանգավոր օրակարգը հրապարակավ առաջ է տանում երկրի վարչապետը։ Սա այլևս քաղաքական բանավեճ չէ․ սա ուղիղ հարձակում է ազգային ինքնության հիմքերի վրա։
Հայ Առաքելական Եկեղեցին քաղաքական կառույց չէ, որ ենթարկվի իշխանության քմահաճույքին։ Այն հազարամյակների ընթացքում եղել է պետականության բացակայության ժամանակ ժողովրդի միակ հենարանը։ Եվ այսօր այդ նույն եկեղեցուն փորձ է արվում ենթարկել քաղաքական կամքին՝ օգտագործելով ներսից դավաճանություն։
Ցավով պետք է արձանագրել՝ մի քանի եպիսկոպոսներ դավաճանել են իրենց կոչմանը, Եկեղեցուն և Վեհափառ Հայրապետին՝ միանալով իշխանության վտանգավոր խաղին։ Դա ոչ թե այլակարծություն է, այլ բարոյական կապիտուլյացիա։ Եկեղեցու ներսում գործակալ դառնալը հոգևոր առաջնորդ լինելու հետ անհամատեղելի է։
Սրբությունը չի կարող լինել բանակցության թեմա։ Եկեղեցին չի կարող դառնալ քաղաքական գործիք։ Իսկ ժողովուրդը լուռ չի լինելու, երբ ոտնահարվում է իր հավատքը, իր պատմությունը և իր արժանապատվությունը։
Մայր Աթոռ Սուրբ Էջմիածինը կուսակցական տարածք չէ։ Դա համազգային սրբավայր է։ Եվ ով ձեռք է բարձրացնում դրա նկատմամբ՝ անկախ պաշտոնից կամ հոգևոր աստիճանից, կանգնում է ժողովրդի և պատմության դատաստանի առաջ»։