«Զարմանում եմ, որ հակաեկեղեցական արշավին միացել է նաև «Հանրապետություն» կուսակցությունը»․ Սուրեն Սուրենյանց

«Զարմանում եմ, որ Նիկոլ Փաշինյանի պաշտպանությանը՝ հակասահմանադրական, հակաեկեղեցական կամպանիայում, լծվել է նաև «Հանրապետություն» կուսակցությունը, այն պարագայում, երբ որ 10 տիրադավների հայտարարությունը վստահաբար գրվել է վարչապետի աշխատասենյակում, և սլաքներն արդեն ուղղվում են Վազգեն Սարգսյանի դեմ»,- այս մասին «24Նյուզ»-ի հետ զրույցում նշեց քաղաքագետ Սուրեն Սուրենյանցը։

«Այսինքն՝ ակնարկում են, որ Վազգեն Սարգսյանը խորթ մեթոդներ է բանեցրել, իսկ ես հավաստում եմ, որ բացարձակապես չեն եղել խորթ միջամտություններ։ Նույնիսկ կասկած չէր հարուցվում, որ Գարեգին Բ-ն հաղթելու էր այդ ընտրություններում»,- նշեց Սուրենյանցը՝ անդրադառնալով դիտարկմանը, որ տիրադավ եպիսկոպոսները, խոսելով այն մասին, թե իբր Ամենայն Հայոց Կաթողիկոս Գարեգին Բ-ն 1999 թ-ին դարձել է Հայրապետ ահաբեկության և ճնշումների մթնոլորտում, ուղղակիորեն մեղադրում են այդ օրերի իշխանության իրական կրող Վազգեն Սարգսյանին։

«Այս պատմության հաջորդ թիրախը դառնալու է Վազգեն Սարգսյանը։ Ինձ զարմացնում է իրենց Վազգեն Սարգսյանի գծի շարունակողներ համարողների լոյալությունը այս հակաեկեղեցական, հակաաստվածային արշավին»,- նշեց քաղաքագետը։