Սրբուհի Գալյանը՝ «Արթիկ» ՔԿՀ-ի պետի տեղակալի որդու մասնակցությամբ ծեծի մասին

Զորական գյուղում տեղի ունեցած միջադեպի հետ կապված՝ լրագրողները հարց ուղղեցին Արդարադատության նախարար Սրբուհի Գալյանին, թե ինչո՞ւ է մինչ այժմ «Արթիկ» ՔԿՀ-ի պետի տեղակալը պաշտոնավարում։ «Քանի դեռ չեն ստացվել տվյալներ, որ հայրը խոչընդոտել է քննության իրականացմանը, ինչ-որ կերպ ազդել է նախաքննության վրա կամ փորձել է ինչ-որ պայմաններ ստեղծել, որ որդին ավելի լավ պայմաններում խափանման միջոցը կրի, մենք չենք դիտարկել պաշտոնավարման դադարեցման հարցը։ Եթե և երբ ձեռք կբերվեն այնպիսի տվյալներ, որոնք անհամատեղելի կլինեն լիազորությունների շարունակականության հետ, մենք այդ հարցը կքննարկենք։ Եթե մենք անմիջապես կասեցնեինք նրա լիազորությունները, մեզ կմեղադրեին, որ մենք ուղղակի հաշվեհարդար ենք փորձում տեսնել»,- ասաց Սրբուհի Գալյանը։

Ավելի վաղ հայտնել էինք, որ ծեծի ենթարկող անչափահասներից մեկն «Արթիկ» ՔԿՀ-ի պետի տեղակալի որդին է: