«Եկեղեցին լինելու է առաջիններից մեկն, ով դիմադրելու է հետագա «ադրբեջանական պրոյեկտներին»». Շիրազ Խաչատրյան

«Հենակետ» ՀԿ-ի փորձագետ Շիրազ Խաչատրյանի ֆեյսբուքյան գրառումը. «Այս պահին Հայաստանում միակ ու ամենակայուն համակարգը, որն ունակ է դիմադրելու Փաշինյանի դիկտատորական որոշումներին և կանգնելու Հայաստանի աստիճանական ադրբեջանացման գործընթացի ճանապարհին, Հայ Առաքելական Եկեղեցին է։ Սա այն կառույցն է, որն ունի իրական դիմադրողականություն և ազգային ինքնության պահպանման ներուժ։ Եվ հենց այդ պատճառով է, որ նիկոլական ռեժիմը փորձում է թուլացնել Եկեղեցին՝ ներսից։
Ամեն բան այնքան ակնհայտ է. մինչ օրս Եկեղեցին է միջազգային հարթակներում սուր ձևով բարձրաձայնում Արցախի և արցախցիների ճակատագրի մասին, ահազանգում է հայկական մշակութային ժառանգության համակարգված ոչնչացման գործընթացի վերաբերյալ, բացահայտ քննադատում է ալիևյան ռեժիմը։
Եվ կասկած չունենաք՝ Եկեղեցին լինելու է առաջիններից մեկը, ով դիմադրելու է հետագա «ադրբեջանական պրոյեկտներին», որոնց նպատակն է ժամանակի ընթացքում կլանել Հայաստանը, «փախստականի» կարգավիճակով ադրբեջանցիներին հաստատվել Հայաստանի տարբեր հատվածներում, այդ թվում՝ բնակավայրերի, մզկիթների կառուցմամբ։ Եվ եթե հարց է՝ ո՞վ է կանգնելու այդ գործընթացների դիմաց, համոզված եմ՝ առաջիններից մեկը հենց Եկեղեցին է լինելու: Դա է պատճառը, որ այս դիրքորոշումը անընդունելի է լինելու համ նիկոլական, համ էլ ալիևյան ռեժիմների համար։
Ու հիմա, ինչ փորձում են անել հայաստանյան ներկա կառավարիչները, պատահական և կարճաժամկետ գործողություններ չեն։ Սրանց ռազմավարությունն իրականում երկարաժամկետ ծրագիր է՝ նպատակաուղղված ոչ թե Հայաստանի անվտանգային կամ տնտեսական կայունության ապահովմանը, այլ ուղղակի մեր պետության դարպասները թշնամու առաջ կամաց-կամաց բացելու հաշվարկ:
Սա է սրանց «քլունգի քաղաքականությունը»՝ քանդել, խարխլել վերջին դիմադրողականություն ցույց տվող համակարգերը, մնացյալ էմոցիոնալ զեղումները հանդիսատեսի համար են...»: