Ռուբիոն և Լավրովը քննարկել են ռուս-ուկրաինական բանակցությունների արդյունքները

Ռուսաստանի ԱԳՆ ղեկավար Սերգեյ Լավրովն ու ԱՄՆ պետքարտուղար Մարկո Ռուբիոն հեռախոսազրույցի ընթացքում քննարկել են նախօրեին Ստամբուլում կայացած ռուս-ուկրաինական բանակցությունների արդյունքները: Այս մասին հայտնել է Ռուսաստանի ԱԳՆ-ն։

Գերատեսչության փոխանցմամբ՝ Ռուբիոն ընդգծել է Վաշինգթոնի պատրաստակամությունը՝ շարունակել նպաստել ռուս-ուկրաինական հակամարտության կարգավորմանը։ Նա ողջունել է ռազմագերիների փոխանակման և հրադադարի հասնելու համար անհրաժեշտ պայմանների ներկայացման վերաբերյալ կողմերի համաձայնությունը։

Լավրովը հաստատել է Ռուսաստանի պատրաստակամությունը՝ շարունակել աշխատանքը Միացյալ Նահանգների հետ հարաբերությունների կարգավորման ուղղությամբ։ Զրուցակիցները նաև կարծիքներ են փոխանակել Ռուսաստանի և Միացյալ Նահանգների միջև շփումների շարունակման վերաբերյալ։

ԱՄՆ Պետդեպարտամենտը, իր հերթին, հայտնել է, որ Ռուբիոն ողջունել է գերիների փոխանակման համաձայնագիրը և «փոխանցել նախագահ Թրամփի՝ անհապաղ հրադադարի և բռնության դադարեցման վերաբերյալ հստակ ուղերձը»:

Հիշեցնենք՝ մայիսի 17-ին Ստամբուլում կայացել էին ՌԴ-ի և Ուկրաինայի պատվիրակությունների ուղիղ բանակցությունները, որոնց արդյունքում կողմերը համաձայնության էին եկել, որ յուրաքանչյուր կողմ կներկայացնի հնարավոր հրադադարի իր տեսլականը հետագա քննարկման համար: