Իսրայելը հարվածներ է հասցրել Լիբանանի հարավին

Իսրայելը ավիահարվածներ է հասցրել Լիբանանի հարավում գտնվող «Հեզբոլլահ» խմբավորման թիրախներին։ Այս մասին հայտնել է Իսրայելի պաշտպանության բանակը:

«Ի պատասխան Իսրայելի ուղղությամբ այսօր առավոտյան հրթիռակոծության՝ վարչապետ Բենիամին Նեթանյահուն և պաշտպանության նախարար Իսրայել Կացը հրամայել են պաշտպանության բանակին վճռականորեն գործել Լիբանանում տասնյակ ահաբեկչական թիրախների դեմ»,- հայտնել է Իսրայելի վարչապետի գրասենյակը։
Նշենք, որ Իսրայելի պաշտպանության բանակի խոսնակի գրասենյակը հայտնել էր, որ մարտի 22-ին՝ ժամը 7:30-ի սահմաններում Լիբանանից Իսրայել է արձակվել երեք հրթիռ, որոնք որսացել են Իսրայելի ռազմաօդային ուժերը: Որոշ ժամանակ անց պարզվել է, որ ընդհանուր առմամբ 6 հրթիռ է արձակվել Լիբանանից, սակայն երեքն ընկել են լիբանանյան տարածքի վրա, իսկ մնացած երեքը մտել են Իսրայելի օդային տարածք ու ոչնչացվել երկնքում։