«Բոյկոտը տրանսպորտի բնականոն աշխատանքը խաթարելու նպատակ չունի»․ Հայկ Մարության

«Արձանագրում ենք, որ ժողովրդի պահանջը դե ֆակտո կատարվել է, ով ուզում է 100 դրամով երթևեկել, հանգիստ երթևեկում է։ Այս ընդհանուր շարժումը հասել է իր նպատակին։ Դե յուրե ունենք 150 դրամի տարբերակը, որը ժողովրդին չի բավարարում»,- ամփոփելով ուղեվարձի թանկացման բոյկոտի առաջին օրը՝ լրագրողների հետ զրույցում ասաց նախկին քաղաքապետ Հայկ Մարությանը․ «Իշխանական լրատվականները տեսանյութեր են տարածում, թե տրանսպորտը բնականոն աշխատում է, բա էդպես էլ պետք է լինի։ Իրենք սխալ են հասկացել, բոյկոտի նպատակը տրանսպորտի բնականոն աշխատանքը խաթարելը չէր։ Մարդիկ ուղղակի 150-ի փոխարեն տալիս են 100 դրամ»,- ասաց Մարությանը՝ հորդորելով շարունակել բոյկոտը։ «Խնդրում եմ բոլոր քաղաքական ուժերին այս ժողովրդական շարժումը չօգտագործել քաղաքական դիվիդենտներ քաղելու նպատակով»,- ասաց Մարությանը՝ նշելով, որ բոյկոտը շարունակվելու է։