«Վատատեսական կանխատեսումներն իրականանում են». Մարությանն առաջարկում է նոր ընտրությունների գնալ

Երևանի նախկին քաղաքապետ, Երևանի ավագանու անդամ Հայկ Մարությանը ֆեյսբուքյան իր էջում գրել է․ «Ցավոք սրտի, մեր վատատեսական կանխատեսումներն իրականանում են․ Երևանի ավագանին ներկա կոնֆիգուրացիայով չի կարողանում արդյունավետ աշխատել։
Սիրելի երևանցիներ, հիշում եք, որ ընտրություններից հետո առաջարկում էինք նոր ընտրության գնալ՝ Երևանում նորմալ կառավարում ապահովելու նպատակով։ ՔՊ-ականներն ու իրենց արբանյակները, ինչպես նաև որոշ ընդիմադիրներ, հրաժարվեցին այս ճանապարհից։ Հիմա տեսնում ենք, որ երկու ամիս անց քաղաքային իշխանությունն ամենատարրական որոշումները չի կարողանում ընդունել, իսկ ավագանու նիստերը քաղաքակիրթ բանավեճի փոխարեն վերածվել են ամենագռեհիկ հայհոյախոսությունների հարթակի:
Սա, ինչպես ասացի, սպասելի էր, որովհետև ՉԻ՛ ԿԱՐՈՂ ՓՈՔՐԱՄԱՍՆՈՒԹՅԱՆ ԻՇԽԱՆՈՒԹՅՈՒՆՆ ԱՐԴՅՈՒՆԱՎԵՏ ԿԱՌԱՎԱՐԵԼ (հիշեցնում եմ՝ ավագանու 65 անդամներից ընդամենը 32-ն են իշխանության ներկայացուցիչ՝ այսինքն, փոքրամասնությունը): Նրանք չունեն ո՛չ ֆորմալ, ո՛չ փաստացի լեգիտիմություն, ու այս պայմաններում խնդիրները գնալով ավելի ակնառու են դառնալու և ի վերջո, վնասելու են մեր քաղաքին։
Հետևաբար, առաջարկս ուժի մեջ է՝ գնալ քաղաքային նոր ընտրությունների և կայուն իշխանություն ձևավորել՝ հանուն մեր քաղաքի բնականոն զարգացման։
Հ․ Գ․ Մեր քննադատները սեպտեմբերին ասում էին, թե նոր ընտրության գնալու առաջարկը ընդունելի չէ, իբր «ստեղծված պայմաններում ավելորդ ծախսեր չանելու համար»: Սա առնվազն ծիծաղելի պատճառաբանություն է, հաշվի առնելով, որ ՔՊ-ն «ստեղծված պայմաններում» մսխում է բյուջեի փողերը՝ ճոխ յուբկաներով երդմնակալությունների, չկայացած սնուփդոգյան համերգների, ամանորյա և այլ տոնակատարությունների վրա»։